പത്തനംതിട്ട : പിണറായി സർക്കാരിന്റെ അഴിമതി, കെടുകാര്യസ്ഥത, ഭരണകൂട ഭീകരത എന്നിവക്കെതിരെ കെ.പി.സി.സി പ്രസിഡന്റും പ്രതിപക്ഷ നേതാവും നയിക്കുന്ന സമരാഗ്നി ജനകീയ പ്രക്ഷോഭ യാത്രയിൽ പിണറായി സർക്കാരിനെതിരായ ജനങ്ങളുടെ പ്രതിഷേധം ശക്തമാകുമെന്ന് കെ.പി.സി.സി ജനറൽ സെക്രട്ടറി ടി.യു രാധാകൃഷ്ണൻ പറഞ്ഞു. ജനകീയ പ്രക്ഷോഭ യാത്രയുടെ മുന്നൊരുക്കങ്ങൾ ചർച്ച ചെയ്യുന്നതിനായി ചേർന്ന ഡി.സി.സി നേതൃയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ശമ്പളവും പെൻഷനും നല്കാതെ കാലിയായ ഖജനാവുമായി സമസ്ത മേഖലകളിലും പരാജയപ്പെട്ട സർക്കാരാണ് കേരളം ഭരിക്കുന്നതെന്നും ബജറ്റിലെ നികുതി വർദ്ധനവ് മൂലം ജനജീവിതം കൂടുതൽ ദുരിതപൂർണ്ണമായി മാറിയിരിക്കുകയാണെന്നും കെ.പി.സി.സി ജനറൽ സെക്രട്ടറി പറഞ്ഞു. ഫെബ്രുവരി 24- ന് പത്തനംതിട്ടയിൽ എത്തിച്ചേരുന്ന സമരാഗ്നി ജനകീയ പ്രക്ഷോഭയാത്ര വൻ വിജയമാക്കുവാൻ ജില്ലയിൽ എല്ലാ നേതാക്കളും സംഘടനാ ഘടകങ്ങളും രംഗത്ത് ഇറങ്ങണമെന്ന് കെ.പി.സി.സി സംഘടനാ ചുമതല കൂടി വഹിക്കുന്ന ജനറൽ സെക്രട്ടറി ടി.യു. രാധാകൃഷ്ണൻ അഭ്യർത്ഥിച്ചു.
നേതൃയോഗത്തിൽ ഡി.സി.സി പ്രസിഡന്റ് പ്രൊഫ.സതീഷ് കൊച്ചുപറമ്പിൽ അദ്ധ്യക്ഷത വഹിച്ചു. കെ.പി.സി ജനറൽ സെക്രട്ടറി അഡ്വ.പഴകുളം മധു, യു.ഡി.എഫ് ജില്ലാ കൺവീനർ എ.ഷംസുദ്ദീൻ, നേതാക്കളായ ജോർജ്ജ് മാമ്മൻ കൊണ്ടൂർ, ഏഴംകുളം അജു, റോബിൻ പീറ്റർ, ജോർജ്ജ് മാമ്മൻ കൊണ്ടൂർ, റിങ്കുചെറിയാൻ, അനീഷ് വരിക്കണ്ണാ മല, എ.സുരേഷ് കുമാർ,സാമുവൽ കിഴക്കുപുറം, വെട്ടൂർ ജ്യോതിപ്രസാദ്, അനിൽ തോമസ്, ടി.കെ സാജു, മാത്യു കുളത്തുങ്കൽ, കെ.ജയവർമ്മ, സജി കൊട്ടക്കാട്, ഏബ്രഹാം മാത്യു പനച്ചിമൂട്ടിൽ, കെ. ജാസിംകുട്ടി, റോജി പോൾ ഡാനിയേൽ, എം.ജി കണ്ണർ ,വിജയ് ഇന്ദുചൂഡൻ, രജനി പ്രദീപ്, നഹാസ് പത്തനംതിട്ട, ടി.എച്ച് സിറാജുദ്ദീൻ എന്നിവർ പ്രസംഗിച്ചു.
