ഡല്ഹി: പിഎസ്എല്വി സി-55 വിക്ഷേപണം വിജയം. സിംഗപ്പൂരിന്റെ രണ്ട് ഉപഗ്രഹങ്ങള് ഭ്രമണപഥത്തിലെത്തിച്ചു. ശ്രീഹരിക്കോട്ടയിലെ സതീഷ് ധവാന് സെന്ററില് നിന്നുമായിരുന്നു വിക്ഷേപണം. ഐഎസ്ആര്ഒയുടെ ഈ വര്ഷത്തെ മൂന്നാമത്തെ വലിയ വിക്ഷേപണമായിരുന്നു ഇത്. പിഎസ്എല്വി-സി 55 റോക്കറ്റാണ് വിക്ഷേപണത്തിനായി ഐഎസ്ആര്ഒ ഉപയോഗിക്കുന്നത്. ഇന്ന് ഉച്ചയ്ക്ക് 2.19നായിരുന്നു വിക്ഷേപണം. വാണിജ്യ വിക്ഷേപണത്തിന്റെ ഭാഗമായി ടെലിയോസ്-2, ലൂമെലൈറ്റ് -4 എന്ന രണ്ട് സിംഗപ്പൂര് ഉപഗ്രഹങ്ങളാണ് ബഹിരാകാശത്തിലേക്ക് കുതിച്ചുയര്ന്നത്.
സിംഗപ്പുരില്നിന്നുള്ള രണ്ട് ഉപഗ്രഹങ്ങള് ഭ്രമണപഥത്തില് എത്തിക്കുന്നതിനൊപ്പം പോം (പിഎസ്എല്വി ഓര്ബിറ്റല് എക്സ്പരിമെന്റ് മൊഡ്യൂള് – പിഒഇഎം) എന്ന മൊഡ്യൂളും വിക്ഷേപണത്തിന്റെ ഭാഗമാകുന്നു. പോം വഹിക്കുന്ന പിഎസ്എല്വിയുടെ മൂന്നാമത്തെ ദൗത്യമാണിത്. പിഎസ്എല്വി-സി53 ആയിരുന്നു പോമുമായി ആദ്യം വിക്ഷേപിച്ചത്. പോളാര് എര്ത്ത് ഓര്ബിറ്റില് പരീക്ഷണം നടത്തുകയാണ് പോമിന്റെ കര്ത്തവ്യം.
