തിരുവനന്തപുരം : വർക്കലയിൽ കൗൺസിലിംഗിനെത്തിയ പ്രായപൂർത്തിയാകാത്ത പെൺകുട്ടിയെ ലൈംഗികമായി പീഡിപ്പിച്ച കേസിൽ സൈക്കോളജിസ്റ്റ് പിടിയിലായി. കൊല്ലം മയ്യനാട് ക്ഷേത്രത്തിന് സമീപം താമസിക്കുന്ന സന്തോഷ് കുമാർ ആണ് വർക്കല പോലീസിന്റെ പിടിയിലായത്. വർക്കല പുത്തഞ്ചിറയിൽ ഒരു സ്വകാര്യ കൗൺസിലിംഗ് സെന്റർ നടത്തിവരികയായിരുന്നു ഇയാൾ. അമ്മയോടൊപ്പം കൗൺസിലിംഗിനായി എത്തിയ പെൺകുട്ടിയെ, അമ്മയെ പുറത്തുനിർത്തി കൗൺസിലിംഗ് എന്ന വ്യാജേന മുറിക്കുള്ളിൽ പ്രവേശിപ്പിച്ചാണ് ഇയാൾ പീഡനത്തിന് ഇരയാക്കിയത്.
പീഡനവിവരത്തെത്തുടർന്ന് കുട്ടിയുടെ സ്വഭാവത്തിൽ പ്രകടമായ മാറ്റങ്ങൾ കണ്ടതിനെത്തുടർന്ന് കുടുംബാംഗങ്ങൾ മറ്റൊരു കൗൺസിലറെ സമീപിച്ചപ്പോഴാണ് ക്രൂരമായ ഈ വിവരം പുറംലോകമറിയുന്നത്. തുടർന്ന് വർക്കല പോലീസ് സ്റ്റേഷനിൽ പരാതി നൽകുകയും പോലീസ് എഫ്.ഐ.ആർ രജിസ്റ്റർ ചെയ്യുകയും ചെയ്തു. സംഭവത്തിന് ശേഷം കുറച്ചുനാളായി ഒളിവിൽ കഴിഞ്ഞിരുന്ന പ്രതിയെ തിരുവനന്തപുരത്ത് നിന്നാണ് പോലീസ് ഇന്നലെ അറസ്റ്റ് ചെയ്തത്.
