റാന്നി: പുതുശ്ശേരിമല കിഴക്ക് വാർഡ് ഉപതെരഞ്ഞെടുപ്പില്‍ ഇടതുപക്ഷ ജനാധിപത്യ മുന്നണി സ്ഥാനാർത്ഥി നാമനിർദ്ദേശ പത്രിക സമര്‍പ്പിച്ചു. അജിമോനാണ് സ്ഥാനാർത്ഥി. ചുറ്റിക അരിവാൾ നക്ഷത്രം ചിഹ്നത്തിലാണ് മത്സരിക്കുക. റാന്നി പഞ്ചായത്ത് സെക്രട്ടറി ജി സുധാകുമാരിക്ക് മുമ്പാകെയാണ് നാമനിർദ്ദേശപത്രിക സമർപ്പിച്ചത്. ഡിസംബർ 12ന് ആണ് തെരഞ്ഞെടുപ്പ് നടക്കുക. റാന്നി പഞ്ചായത്ത് ഏഴാം വാർഡ് മെമ്പർ ആയിരുന്ന എ.എസ് വിനോദ് കുമാർ രാജിവെച്ചതിനെ തുടർന്നാണ് ഇവിടെ ഉപതെരഞ്ഞെടുപ്പ് പ്രഖ്യാപിച്ചത്.
ബിജെപി സ്ഥാനാർത്ഥിയായി മത്സരിച്ച് വിജയിച്ച വിനോദ് കുമാർ പാർട്ടിവിപ്പ് ലംഘിച്ചു കോൺഗ്രസിന് ഒപ്പം നിന്നിരുന്നു. വിപ്പ് ലംഘനത്തിന് എതിരെ ബിജെപി തെരഞ്ഞെടുപ്പ് കമ്മീഷന് പരാതി നൽകിയിട്ടുണ്ട്. ഇതു സംബന്ധിച്ച് തെരഞ്ഞെടുപ്പ് കമ്മീഷന്റെ നടപടി വരാനിരിക്കെയാണ് വിനോദ് കുമാർ മെമ്പർ സ്ഥാനം രാജിവെച്ചത്. നാമനിർദ്ദേശ പത്രിക സമർപ്പിച്ച അജിമോനെ പഞ്ചായത്ത് മെമ്പർ സച്ചിൻ വയല മാലയണിയിച്ച് സ്വീകരിച്ചു. എൽഡിഎഫ് കൺവീനർ ജോജോ കോവൂർ, സിപിഐ(എം) ലോക്കൽ സെക്രട്ടറി ബിനോയി കുര്യാക്കോസ്, കേരള കോൺഗ്രസ് മണ്ഡലം പ്രസിഡൻറ് ദിലീപ് ഫിലിപ്പ് എന്നിവരും പത്രിക സമർപ്പിക്കാൻ ഒപ്പം ഉണ്ടായിരുന്നു.
