പുനലൂര് : പകല് വൈദ്യുതി മുടങ്ങിയതോടെ മെഴുകുതിരിയുടെയും മൊബൈല് ഫോണിന്റെയും വെളിച്ചത്തില് ജോലി ചെയ്ത് നഗരസഭ ഓഫീസിലെ ജീവനക്കാര്. കെ.എസ്.ആര്.ടി.സി ജങ്ഷനില് ദേശീയ പാതയിലെ വൈദ്യുതി പോസ്റ്റുകള് മാറ്റി സ്ഥാപിക്കുന്നതിനായി പകല് മുഴുവന് വൈദ്യുതി ബന്ധം വിച്ഛേദിച്ചു. ഇതോടെ നഗരസഭ അടക്കം മിക്ക ഓഫീസുകളിലും കടകളിലും സ്ഥാപനങ്ങളിലുള്ളവരും വലഞ്ഞു.
നഗരസഭ ഓഫീസില് ലക്ഷങ്ങള് ചെലവഴിച്ച് സ്ഥാപിച്ചിട്ടുള്ള ജനറേറ്റര് സംവിധാനം അറ്റകുറ്റപ്പണി ചെയ്യാതെ തകരാറിലായതാണ് ജീവനക്കാര് പ്രതിസന്ധിയിലാകാന് കാരണം. വിവിധ ആവശ്യങ്ങള്ക്കായി നഗരസഭയിലെത്തിയവരും ജീവനക്കാരും ഒരുപോലെ വലഞ്ഞു. അത്യാവശ്യ കാര്യങ്ങള്ക്ക് മെഴുകുതിരിയും മൊബൈലും തെളിച്ചാണ് ജീവനക്കാര് കാര്യങ്ങള് നടത്തിയത്. ദേശീയപാതയില് നില്ക്കുന്ന വൈദ്യുതി പോസ്റ്റുകള് മാറ്റാന് നഗരസഭ നാലു ലക്ഷത്തോളം രൂപ അടിയന്തരമായി അടച്ചതിനെ തുടര്ന്നാണ് വ്യാഴാഴ്ച പോസ്റ്റുകള് മാറിയത്.
