പത്തനംതിട്ട : ശക്തമായ മഴ പെയ്യുന്ന സാഹചര്യത്തില് മണ്ണിടിച്ചില്, ഉരുള്പൊട്ടല് തുടങ്ങിയ ദുരന്ത സാധ്യതകള് ഒഴിവാക്കുന്നതിനായി ഒക്ടോബര് 16നും 17നും പത്തനംതിട്ട ജില്ലയിലെ എല്ലാ ക്വാറികളുടെയും പ്രവര്ത്തനവും, മലയോരത്തു നിന്നും മണ്ണ് വെട്ടിമാറ്റുക, ആഴത്തിലുള്ള കുഴികള് നിര്മിക്കുക, നിര്മാണത്തിനായി ആഴത്തില് മണ്ണ് മാറ്റുക എന്നീ പ്രവര്ത്തനങ്ങളും നിരോധിച്ച് ജില്ലാ കളക്ടറും ജില്ലാ ദുരന്തനിവാരണ അതോറിറ്റി ചെയര്പേഴ്സണുമായ ഡോ. ദിവ്യ എസ്. അയ്യര് ഉത്തരവായി.
ഇക്കാര്യങ്ങള് ദുരന്ത നിവാരണ നിയമ പ്രകാരം ജില്ലാ പോലീസ് മേധാവി, ജില്ലാ ജിയോളജിസ്റ്റ്, റവന്യൂ ഡിവിഷണല് ഓഫീസര് അടൂര്/തിരുവല്ല, തഹസില്ദാര്മാര് എന്നിവര് ഉറപ്പ് വരുത്തണം. നിര്ദേശങ്ങള് ലംഘിക്കുന്നവര്ക്കെതിരെ ദുരന്ത നിവാരണ നിയമ പ്രകാരം കര്ശന നടപടികള് സ്വീകരിക്കും.
ഇത്തരത്തിലുള്ള ഏതു ലംഘനവും ശ്രദ്ധയില്പ്പെട്ടാല് ജനങ്ങള് ഉള്പ്പടെ ആര്ക്കും അതത് താലൂക്കുകളിലെ കണ്ട്രോള് റൂമുകളില് പരാതിപ്പെടാം. ബന്ധപ്പെട്ട തഹസില്ദാര്മാര് പരാതികളിന്മേല് സത്വര നടപടികള് സ്വീകരിച്ച് അത്തരം പ്രവര്ത്തനം നടക്കുന്നില്ല എന്ന് ഉറപ്പ് വരുത്തുകയും കാരണക്കാരായവര്ക്കെതിരെ ദുരന്ത നിവാരണ നിയമ പ്രകാരം നടപടി സ്വീകരിക്കേണ്ടതുമാണെന്നും ഉത്തരവില് പറയുന്നു.
