കോട്ടയം : പേവിഷബാധ സ്ഥിരീകരിച്ച ഇതരസംസ്ഥാന തൊഴിലാളി മെഡിക്കല്‍ കോളജ് ആശുപത്രിയില്‍ നിന്ന് അര്‍ധരാത്രി ചാടിപ്പോയി. ജില്ലയില്‍ ജാഗ്രതനിര്‍ദേശം നല്‍കിയതിനെ തുടര്‍ന്ന് പോലീസ് വ്യാപക തിരച്ചില്‍ തുടങ്ങി. ഇന്നലെ രാത്രി 12.30നാണു സംഭവം. അസം സ്വദേശിയായ ജീവന്‍ ബറുവ (39) നായയുടെ കടിയേറ്റ് ജനറല്‍ ആശുപത്രിയില്‍ ചികിത്സയിലായിരുന്നു. തുടര്‍ന്നു വിദഗ്ധ പരിശോധനയ്ക്കായി മെഡിക്കല്‍ കോളജ് ആശുപത്രിയിലേക്ക് അയച്ചു.
രണ്ട് സുഹൃത്തുക്കളോടൊപ്പം ഓട്ടോറിക്ഷയില്‍ രാത്രി 10.30ന് അത്യാഹിത വിഭാഗത്തില്‍ എത്തി. തുടര്‍ന്നുള്ള പരിശോധനയിലാണു പേ വിഷബാധ സ്ഥിരീകരിച്ചത്. യുവാവിനെ സാംക്രമികരോഗ വിഭാഗത്തിലേക്കു മാറ്റിയെങ്കിലും അവിടെനിന്ന് ഇറങ്ങിയോടി. ആശുപത്രി അധികൃതര്‍ പോലീസിനെ അറിയിച്ചതിനെ തുടര്‍ന്നാണ് ജില്ലയില്‍ ജാഗ്രത നിര്‍ദേശം നല്‍കിയത്. യുവാവിനൊപ്പം എത്തിയ സുഹൃത്തുക്കളെയും കാണാനില്ലെന്ന് പോലീസ് അറിയിച്ചു.
