പത്തനംതിട്ട: പന്തളം കൊട്ടാരം വലിയ തമ്പുരാൻ കുളനട കൈപ്പുഴ മംഗളവിലാസം കൊട്ടാരത്തിൽ മകയിരം നാൾ രാഘവവർമ്മ രാജ അന്തരിച്ചു. സംസ്കാരം ഇന്ന് ഉച്ചയ്ക്ക് 12.30-ന് തിരുവനന്തപുരം ശാന്തി കവാടത്തിൽ. തിരുവനന്തപുരത്ത് പെരുന്താന്നിയിലുള്ള മകളുടെ വീട്ടിലായിരുന്നു അന്ത്യം. മദ്ധ്യപ്രദേശ് വൈദ്യുതി ബോർഡിൽ ഡിവിഷണൽ അക്കൗണ്ടന്റായിരുന്നു അദ്ദേഹം. കൈപ്പുഴ മംഗളവിലാസം കൊട്ടാരത്തിൽ പരേതരായ അശ്വതിനാൾ തന്വംഗി തമ്പുരാട്ടിയുടെയും ഇരവി നമ്പൂതിരിപ്പാടിന്റെയും മകനാണ്.
പന്തളം കൊട്ടാരം നിർവാഹക സംഘത്തിന്റെ പ്രസിഡന്റായി പ്രവർത്തിച്ചിരുന്നു. രാജപ്രതിനിധിയായി തിരുവാഭരണ ഘോഷയാത്രയെ നയിച്ചിരുന്നു അദ്ദേഹം. വലിയ തമ്പുരാൻ തിരുവോണം നാൾ രാജാരാജ വർമ്മയുടെ നിര്യാണത്തിന് പിന്നാലെ 2022 ജൂൺ 20-നാണ് വലിയ തമ്പുരാനായി ചുമതലയേറ്റത്. വലിയ തമ്പുരാന്റെ നിര്യാണത്തെ തുടർന്ന് ആശൂലമായതിനാൽ പന്തളം വലിയ കോയിൽക്ഷേത്രം അടച്ചു. 15-ന് നട തുറക്കും. ഭാര്യ: ചെറുകോൽ കൊട്ടാരത്തിൽ കൊച്ചോമന തമ്പുരാട്ടി, മകൾ: രേണുക വർമ്മ, മരുമകൻ: ആർ രാജീവ്.
