കൊച്ചി: നിയമസഭ തിരഞ്ഞെടുപ്പ് അടുത്തതോടെ യുഡിഎഫിന്റെ പ്രചാരണത്തിനായി കോണ്ഗ്രസ് മുന് ദേശീയ പ്രസിഡന്റും വയനാട് എംപിയുമായ രാഹുല് ഗാന്ധി ഇന്ന് കേരളത്തില്. എറണാകുളം, കോട്ടയം, ആലപ്പുഴ തുടങ്ങിയ ജില്ലകളിലെ വിവിധ നിയമസഭാ മണ്ഡലങ്ങളില് നടക്കുന്ന പൊതുയോഗങ്ങളില് അദ്ദേഹം പങ്കെടുക്കും.
രാവിലെ 11ന് കൊച്ചി നാവിക വിമാനത്താവളത്തില് എത്തുന്ന രാഹുല് ഗാന്ധി ആദ്യം സെന്റ് തെരേസാസ് കോളജിലെത്തി വിദ്യാര്ഥിനികളുമായുളള സംവാദത്തില് പങ്കെടുക്കും. പിന്നീട് വൈപ്പിന്, കൊച്ചി, തൃപ്പൂണിത്തുറ മണ്ഡലങ്ങളിലെ തിരഞ്ഞെടുപ്പ് യോഗങ്ങളിലും പങ്കെടുക്കും.
വൈകിട്ട് നാലുമണിയോടെ ആലപ്പുഴയിലേക്ക് പുറപ്പെടുന്ന രാഹുല് ഗാന്ധി അരൂര്, ചേര്ത്തല, ആലപ്പുഴ, അമ്പലപ്പുഴ, ഹരിപ്പാട് മണ്ഡലങ്ങളിലെ തിരഞ്ഞെടുപ്പ് യോഗങ്ങളില് പങ്കെടുക്കും. പര്യടനത്തിന്റെ രണ്ടാം ദിവസമായ നാളെ കോട്ടയം ജില്ലയിലും എറണാകുളം ജില്ലയുടെ കിഴക്കന് മേഖലകളിലും പ്രചാരണ യോഗങ്ങളില് പങ്കെടുക്കും.
കേരളത്തില് ഇത്തവണ മത്സരം കടുക്കും എന്നാണ് വിലയിരുത്തല്. നാമനിര്ദേശ പത്രികയുമായി ബന്ധപ്പെട്ട് ആരോപണങ്ങളുമായി ഇരുമുന്നണികളും ബിജെപിയും രംഗത്തുണ്ട്. സംസ്ഥാനത്തെ മൂന്ന് മണ്ഡലങ്ങളില് എന്ഡിഎ സ്ഥാനാര്ത്ഥികളുടെ നാമനിര്ദേശ പത്രിക തള്ളിയത് സിപിഎം-ബിജെപി ഒത്തുകളിയുടെ ഭാഗമായാണെന്ന് കോണ്ഗ്രസ് നേതാവ് ഉമ്മന് ചാണ്ടി പറഞ്ഞിരുന്നു. സിപിഎമ്മിന് ഭരണത്തുടര്ച്ചയും ബിജെപിക്ക് അവരുടെ കേന്ദ്ര നേതൃത്വത്തെ തൃപ്തിപ്പെടുത്തുന്നതിന് അഞ്ചാറ് സീറ്റുകളിലെ വിജയവും നേടിക്കൊടുക്കുന്നതിനാണ് ഇരു പാര്ട്ടികളും കരാറിലെത്തിയതെന്നും ബിജെപിയെ യഥാര്ത്ഥത്തില് എതിര്ക്കുന്ന പാര്ട്ടി കോണ്ഗ്രസ്സാണെന്നും അദ്ദേഹം പറഞ്ഞിരുന്നു.
