തിരുവനന്തപുരം: സെക്രട്ടേറിയറ്റ് മാര്ച്ച് കേസില് യൂത്ത് കോണ്ഗ്രസ് സംസ്ഥാനപ്രസിഡന്റ് രാഹുല് മാങ്കൂട്ടത്തിലിനെ വീടുവളഞ്ഞ് അറസ്റ്റുചെയ്തത് സ്റ്റേഷനില് ഹാജരാകാന് നിര്ദേശിച്ചിരുന്ന സമയത്തിനുമുമ്പെന്ന് രേഖകള്. ഷാഫി പറമ്പിലിന്റെ ചോദ്യത്തിനുമറുപടിയായി മുഖ്യമന്ത്രി സഭയില്വെച്ച രേഖകളിലാണ് അറസ്റ്റിനുമുമ്പുള്ള 41(എ) നോട്ടീസിന്റെ പകര്പ്പുള്ളത്.
കന്റോണ്മെന്റ് സബ് ഇന്സ്പെക്ടര് എസ്.എസ്. ദില്ജിത്ത് നല്കിയ നോട്ടീസില് ജനുവരി ഒമ്പതിന് രാവിലെ 9.30-ന് സ്റ്റേഷനില് ഹാജരാകാനാണ് നിര്ദേശിച്ചിരുന്നത്. എന്നാല്, അന്നേദിവസം അതിരാവിലെ രാഹുലിനെ പോലീസ് വീടുവളഞ്ഞ് അറസ്റ്റുചെയ്യുകയായിരുന്നു. നോട്ടീസ് തയ്യാറാക്കിയതും അന്നേദിവസമാണ്. അറസ്റ്റിനുശേഷമാണ് നോട്ടീസ് തയ്യാറാക്കിയതെന്ന യൂത്ത് കോണ്ഗ്രസ് നേതാക്കളുടെ ആരോപണം ശരിവെക്കുന്നതാണിത്.
