ന്യൂഡല്ഹി : ട്രെയിന് യാത്രക്കാര്ക്ക് ആശ്വാസമേകുന്ന തീരുമാനവുമായി റെയില്വേ. ഇനി മുതല് ദീര്ഘദൂര യാത്രക്കാര്ക്ക് ട്രെയിനുകളില് തലയിണകളും കമ്പിളിയും ടവലുകളും ഷീറ്റുകളും വീണ്ടും ലഭിച്ചു തുടങ്ങും. കൊറോണ രൂക്ഷമായ സാഹചര്യത്തിലാണ് ട്രെയിനുകളിലെ യാത്രക്കാര്ക്ക് ഇവ നല്കുന്നത് നിര്ത്തലാക്കിയത്. രാജ്യത്തെ കൊറോണ രോഗികളുടെ എണ്ണത്തില് വലിയ കുറവ് രേഖപ്പെടുത്തിയ സാഹചര്യത്തിലാണ് ട്രെയിനുകളിലെ യാത്രക്കാര്ക്ക് വീണ്ടും സൗകര്യങ്ങള് ലഭ്യമായി തുടങ്ങുന്നത്.
കമ്പാര്ട്ട്മെന്റുകളിലെ കര്ട്ടനുകളും ഇനി മുതല് ഉപയോഗിക്കും. റെയില്വേ ബോര്ഡാണ് ഇത് സംബന്ധിച്ചുള്ള ഉത്തരവ് പുറത്തിറക്കിയത്. 2020 മെയ്യിലാണ് എസി കോച്ചുകളിലുള്പ്പെടെ കമ്പിളിയും തലയിണയുമെല്ലാം നല്കുന്നത് നിര്ത്തലാക്കിയത്. ആവശ്യമുള്ളവര് സ്വന്തമായി ഇവ കൊണ്ടു വരണമെന്നാണ് റെയില്വേ നിര്ദ്ദേശിച്ചിരുന്നത്. എസി കോച്ചുകളില് താപനില 24-25 ആക്കി ഉയര്ത്തുകയും ചെയ്തിരുന്നു.
