ആലുവ: നീരൊഴുക്ക് ശക്തമായതോടെ പെരിയാറില് ജലനിരപ്പ് ഉയര്ന്നു. രാവിലെയോടെയാണ് വെള്ളം കൂടിയത്.ഇതേ തുടര്ന്ന് മണപ്പുറത്തിന്റെ വിവിധ ഭാഗങ്ങളില് വെള്ളം കയറി. മണപ്പുറം ക്ഷേത്രത്തിലും വെള്ളം കയറി. ഇടുക്കി ജില്ലയിലടക്കം ശക്തമായി പെയ്യുന്ന മഴയാണ് പെരിയാറില് ജലനിരപ്പ് ഉയരാന് ഇടയാക്കിയത്. ദിവസങ്ങളായി പുഴ കലങ്ങി മറിഞ്ഞാണ് ഒഴുകുന്നത്. ചളിയുടെ അളവ് 60 എന്.ടി.യുവരെ എത്തിയിരുന്നു. ഇത് 100 കടന്നാല് ജലശുദ്ധീകരണത്തെ ബാധിക്കുമെന്ന് ആലുവ ജലശുദ്ധീകരണ കേന്ദ്രം അസിസ്റ്റന്റ് എക്സിക്യൂട്ടീവ് എന്ജിനീയര് ജെയിന് രാജ് പറഞ്ഞു. പെരിയാറില് ജലനിരപ്പ് ഉയരുന്നത് തീരങ്ങളിലെ ജനങ്ങളെ ആശങ്കയിലാക്കിയിട്ടുണ്ട്.
രണ്ടു ദിവസം ഇടതടവിലില്ലാതെ മഴ പെയ്തപ്പോഴേക്കും പെരിയാറിലെ ജലനിരപ്പ് അതിവേഗം ഉയരുകയായിരുന്നു. കുറച്ച് അടി കൂടി വെള്ളമുയര്ന്നാല് ആലുവ ഭാഗത്ത് പെരിയാറിന്റെ തീരത്ത് താഴ്ന്ന പ്രദേശങ്ങളില് വെള്ളം കയറാന് സാധ്യതയുണ്ട്. പെരിയാറുമായി ബന്ധപ്പെട്ട് കിടക്കുന്ന തോടുകളിലൂടെയും മറ്റും പാടശേഖരങ്ങളിലേക്കും താഴ്ന്ന ഭാഗങ്ങളിലേക്കും ഇതിനകം വെള്ളം കയറി തുടങ്ങിയിട്ടുണ്ട്.
