ന്യൂഡല്ഹി : രാജീവ് ഗാന്ധി വധക്കേസ് പ്രതി എ.ജി പേരറിവാളന്റെ മോചനത്തില് ഗവര്ണര്ക്കെതിരെ തമിഴ്നാട് സര്ക്കാര് സുപ്രിംകോടതിയെ സമീപിച്ചു. പേരറിവാളനെ മോചിപ്പിക്കണമെന്ന മന്ത്രിസഭാ തീരുമാനത്തിന് ഗവര്ണര് തടസം നിന്നുവെന്നാണ് തമിഴ്നാട് സര്ക്കാറിന്റെ അഭിഭാഷകന് സുപ്രീംകോടതിയെ അറിയിച്ചത്. ജയില് മോചനമാവശ്യപ്പെട്ട് രാജീവ് ഗാന്ധി വധക്കേസ് പ്രതി എ.ജി പേരറിവാളന് സമര്പ്പിച്ച ഹര്ജി സുപ്രിംകോടതി ഇന്ന് പരിഗണിക്കാനിരിക്കെയാണ് തമിഴ്നാട് സര്ക്കാര് സുപ്രീംകോടതിയില് നിലപാട് വ്യക്തമാക്കിയത്.
മന്ത്രിസഭാ ശിപാര്ശ രാഷ്ട്രപതിക്ക് അയച്ച ഗവര്ണറുടെ നടപടി ഭരണഘടനക്ക് എതിരാണ്. രാഷ്ട്രപതിക്കോ, ഗവര്ണര്ക്കോ മന്ത്രിസഭാ തീരുമാനത്തെ ചോദ്യം ചെയ്യാന് കഴിയില്ലെന്നും തമിഴ്നാട് സര്ക്കാര് വ്യക്തമാക്കി. മന്ത്രിസഭാ തീരുമാനങ്ങളില് ഗവര്ണര്മാര് തടസമുണ്ടാക്കാന് തുടങ്ങിയാല് ജനാധിപത്യം താറുമാറാകുമെന്ന് തമിഴ്നാട് സര്ക്കാര് കോടതിയെ അറിയിച്ചു. പേരറിവാളന്റെ ദയാഹര്ജിയില് തീരുമാനം വൈകുന്നതില് സുപ്രിംകോടതി രൂക്ഷവിമര്ശനമുന്നയിച്ചിരുന്നു. ദയാഹര്ജിയില് ഒരാഴ്ചക്കകം കേന്ദ്ര സര്ക്കാര് നിലപാട് അറിയിക്കണം. അല്ലെങ്കില് സുപ്രീം കോടതിക്ക് മോചന ഉത്തരവ് പുറത്തിറക്കേണ്ടി വരുമെന്ന് ജസ്റ്റിസ് എല്.നാഗേശ്വര റാവു അധ്യക്ഷനായ ബെഞ്ച് മുന്നറിയിപ്പ് നല്കിയിരുന്നു.
മന്ത്രിസഭയുടെ ശിപാര്ശയില് തമിഴ്നാട് ഗവര്ണര് മൂന്നര വര്ഷത്തിലധികം തീരുമാനമെടുക്കാതെ വെച്ചിരുന്നു. മോചനക്കാര്യത്തില് ഗവര്ണര്ക്ക് വിയോജിപ്പുണ്ടായിരുന്നെങ്കില് കാബിനറ്റിന് തിരിച്ചയക്കണമായിരുന്നുവെന്നും, രാഷ്ട്രപതിക്കല്ല അയക്കേണ്ടതെന്നും കോടതി പറഞ്ഞിരുന്നു.
