ന്യൂഡല്ഹി : ഉത്തരാഖണ്ഡ് മേഖലയിലെ സ്വന്തം വീട് സന്ദര്ശിച്ച് യുപി മുഖ്യമന്ത്രി യോഗി ആദിത്യനാഥ്. പൗരി ജില്ലയിലെ പഞ്ചൂര് ഗ്രാമമാണ് അദ്ദേഹത്തിന്റെ സ്വന്തം നാട്. രാജ്യം മുഴുവന് കോവിഡ് പൊട്ടിപ്പുറപ്പെട്ടതിനാല്, 2020 ഏപ്രിലില് നടന്ന തന്റെ പിതാവിന്റെ സംസ്കാര ചടങ്ങുകള്ക്ക് പോലും അദ്ദേഹത്തിന് എത്താന് സാധിച്ചിരുന്നില്ല. വീട്ടിലെത്തി അമ്മയെ സന്ദര്ശിച്ച യോഗി ആദിത്യനാഥ് അമ്മയുടെ പാദങ്ങളില് നമസ്കരിച്ച് അനുഗ്രഹം തേടി.
തെരഞ്ഞെടുപ്പില് ജയിച്ച് അധികാരത്തിലെത്തിയ ശേഷം, ഇതാദ്യമായാണ് അദ്ദേഹം സ്വന്തം വീടും ബന്ധുക്കളെയും സന്ദര്ശിക്കുന്നത്. അമ്മയോടൊപ്പമുള്ള ചിത്രം യോഗി തന്റെ ട്വിറ്ററില് പങ്കുവെച്ചിട്ടുണ്ട്. ഹിന്ദിയില് മാ (അമ്മ) എന്ന തലക്കെട്ടാണ് അദ്ദേഹം ചിത്രത്തിന് കൊടുത്തിരിക്കുന്നത്. മൂന്നാം തീയതി, ചൊവ്വാഴ്ച ഗ്രാമത്തിലെത്തിയ യുപി മുഖ്യമന്ത്രി, രാത്രി അവിടെ ചെലവഴിക്കുകയും ബന്ധുവിന്റെ വീട്ടില് നടക്കുന്ന ചടങ്ങുകളില് പങ്കെടുക്കുകയും ചെയ്തു. രാഷ്ട്രീയ പരിപാടികളിലും പൊതുയോഗങ്ങളിലും പങ്കെടുക്കുന്നതിനായാണ് അദ്ദേഹം ഉത്തരാഖണ്ഡില് എത്തിയത്.