പത്തനംതിട്ട : മുൻപ്രധാനമന്ത്രിയും കോൺഗ്രസ് പ്രസിഡന്റുമായിരുന്ന രാജീവ് ഗാന്ധിയുടെ രക്തസാക്ഷിത്വ വാർഷികം ജില്ലാ കോൺഗ്രസ് കമ്മിറ്റിയുടെ നേതൃത്വത്തിൽ 2026 മെയ് 21-ന് വ്യാഴാഴ്ച്ച രാവിലെ 10-മണിക്ക് വിവിധ പരിപാടികളോടെ പത്തനംതിട്ട രാജീവ്ഭവൻ ഓഡിറ്റോറിയത്തിൽ സംഘടിപ്പിക്കുമെന്ന് ഡി.സി.സി സംഘടനാകാര്യ ജനറൽ സെക്രട്ടറി സാമുവൽ കിഴക്കുപുറം പറഞ്ഞു. ഛായാചിത്രത്തിൽ പുഷ്പ്പാർച്ചനക്ക് ശേഷം ഡി.സി.സി പ്രസിഡന്റ് പ്രൊഫ.സതീഷ് കൊച്ചുപറമ്പിലിന്റെ അദ്ധ്യക്ഷതയിൽ നടക്കുന്ന രാജീവ് രക്തസാക്ഷി അനുസ്മരണ സമ്മേളനം കെ.പി.സി.സി കോർകമ്മിറ്റി അംഗവും മുൻ രാജ്യസഭാ ഉപാദ്ധ്യക്ഷനുമായ പ്രൊഫ.പി.ജെ കുര്യൻ ഉദ്ഘാടനം ചെയ്യും.
ജനപ്രതിനിധികൾ, കെ.പി.സി.സി, ഡി.സി.സി, പോഷക സംഘടനാ നേതാക്കൾ എന്നിവർ പ്രസംഗിക്കും. തുടര്ന്ന് രാജീവ് ഭരണത്തിൽ ഇൻഡ്യയുടെ നേട്ടങ്ങൾ എന്ന വിഷയത്തെക്കുറിച്ച് നടക്കുന്ന സെമിനാർ കെ.പി.സി സി വിചാർ വിഭാഗ് ജില്ലാ ചെയർമാനും കോഴഞ്ചേരി സെന്റ് തോമസ് കോളജ് മുൻ പ്രിൻസിപ്പലുമായ ഡോ.റോയിസ് മല്ലശ്ശേരി നയിക്കും. രാജീവ് ഗാന്ധി രക്തസാക്ഷിത്വ വാർഷിക ദിനത്തോടനുബന്ധിച്ച് ജില്ലയിൽ കോൺഗ്രസ് ബ്ലോക്ക്, മണ്ഡലം, വാർഡ്, ബൂത്ത് കമ്മികൾ, പോഷക സംഘടനകൾ എന്നിവയുടെ നേതൃത്വത്തിലും പുഷ്പ്പാർച്ചന അനുസ്മരണ സമ്മേളനം, സേവന പ്രവർത്തനങ്ങൾ എന്നിവ സംഘടിപ്പിക്കുമെന്ന് ഡി.സി.സി സംഘടനാകാര്യ ജനറൽ സെക്രട്ടറി അറിയിച്ചു.
