തിരുവനന്തപുരം: രാഹുല് മാങ്കൂട്ടത്തിലിനെതിരെ പ്രതികരിച്ചതിന് പിന്നാലെ നേരിടുന്ന സൈബര് ആക്രമണത്തില് പ്രതികരിച്ച് മുതിര്ന്ന കോണ്ഗ്രസ് നേതാവ് രാജ്മോഹന് ഉണ്ണിത്താന്. തനിക്കെതിരെ സൈബര് ആക്രമണം നടത്തുന്നത് മാര്ക്സിസ്റ്റ് പാര്ട്ടിയോ ബിജെപിയോ അല്ലെന്നും അതിന് പിന്നില് ആരാണെന്ന് തനിക്കറിയാമെന്നും രാജ്മോഹന് ഉണ്ണിത്താന് പറഞ്ഞു. സൈബര് ആക്രമണം തുടര്ന്നാല് പലതും പരസ്യമായി വിളിച്ച് പറയേണ്ടിവരുമെന്നും അതുകൊണ്ട് തന്നെ അനാവശ്യമായി പ്രകോപിപ്പിക്കാന് നില്ക്കരുതെന്നും രാജ്മോഹന് ഉണ്ണിത്താന് പറഞ്ഞു. കോണ്ഗ്രസില് വ്യക്തിത്വമുളളവരെ സൈബര് ആക്രമണത്തിലൂടെ കീഴ്പ്പെടുത്തി അവരുടെ വായടപ്പിക്കാനാണ് ശ്രമമെങ്കില് കൂടുതല് കാര്യങ്ങള് ഞാന് പറയും. എന്നെക്കൊണ്ട് പറയിപ്പിക്കരുത്.
ഇവന്റെ സകല ചരിത്രവും എനിക്കറിയാം. അതുകൊണ്ട് ഇനി സൈബര് ആക്രമണം തുടര്ന്നാല് പലതും പരസ്യമായി വിളിച്ച് പറയേണ്ടിവരും. ആ പറയുന്നത് അവന്റെ അന്ത്യംകുറിക്കും. എന്നെ അനാവശ്യമായി പ്രകോപിപ്പിക്കരുത്. ഒരു കേസ് മാത്രമല്ല, ഒരുപാട് കേസുകളുണ്ട്. ആ കേസുകളെക്കുറിച്ച് എല്ലാമറിയാവുന്ന ആളാണ് ഞാന്. സൈബര് ആക്രമണം തുടര്ന്നാല് വാര്ത്താസമ്മേളനം നടത്തി ഞാന് എല്ലാം പറയും’: രാജ്മോഹന് ഉണ്ണിത്താന് പറഞ്ഞു.
