കോഴിക്കോട് : രാമനാട്ടുകര സ്വര്ണകള്ളക്കടത്ത് കേസില് കസ്റ്റംസ് കൂടുതല് അറസ്റ്റിനൊരുങ്ങുന്നു. കൊടുവള്ളി സംഘത്തലവന് സൂഫിയാന് അടക്കം പതിനേഴുപേരെയാണ് കസ്റ്റംസ് അറസ്റ്റുചെയ്യുക. പ്രതികളെ അറസ്റ്റ് ചെയ്യണമെന്ന കസ്റ്റംസ് ആവശ്യം കോടതി അംഗീകരിച്ചു. ജയിലിലെത്തിയായിരിക്കും പ്രതികളുടെ അറസ്റ്റ് രേഖപ്പെടുത്തുക.
കരിപ്പൂര് വിമാനത്താവളം വഴി പ്രതികള് സ്വര്ണ്ണ കള്ളക്കടത്തു വ്യാപകമായി നടത്തിയിരുന്നുവെന്ന തെളിവിന്റെ അടിസ്ഥാനത്തിലാണ് അറസ്റ്റ്. കഴിഞ്ഞമാസം ആദ്യമാണ് സൂഫിയാനെ കൊണ്ടോട്ടി പോലീസ് അറസ്റ്റ് ചെയ്തത്. ഇയാള് സഞ്ചരിച്ച കാറും കസ്റ്റഡിയിലെടുത്തിരുന്നു. രാമനാട്ടുകര അപകടം നടന്ന ദിവസം കരിപ്പൂര് വിമാനത്താവളത്തിലും അപകടം നടന്ന സ്ഥലത്തും ഇയാളെത്തിയതായി പോലീസിന് വ്യക്തമായ വിവരം ലഭിച്ചതോടെയായിരുന്നു അറസ്റ്റ്. സ്വര്ണക്കടത്തിനുള്ള വാട്സ്ആപ്പ് ഗ്രൂപ്പുണ്ടാക്കിയത് ഇയാളാണ്. നിരവധി സ്വര്ണ കള്ളക്കടത്തുകേസില് പ്രതിയായ ഇയാള്ക്കെതിരെ മുന്പ് കോഫെപോസയും ചുമത്തിയിട്ടുണ്ട്.
