ന്യൂഡല്ഹി : ഡി.സി.സി പട്ടിക കെ.പി.സി.സി അദ്ധ്യക്ഷന് കെ.സുധാകരന് രാഹുലിന് നല്കിയതിന് പിന്നാലെ പരാതിയുമായി കോണ്ഗ്രസിലെ സീനിയര് നേതാക്കളായ രമേശ് ചെന്നിത്തലയും ഉമ്മന്ചാണ്ടിയും ഹൈക്കമാന്റിനെ സമീപിച്ചു. പട്ടിക തയ്യാറാക്കിയത് വേണ്ടത്ര കൂടിയാലോചന ഇല്ലാതെയാണെന്ന് പരാതിയാണ് ഇവര് ഉയര്ത്തിയിരിക്കുന്നത്. തങ്ങളോട് കൂടി ആലോചിക്കാതെ സുധാകരന് ഇഷ്ടക്കാരെ തിരുകി കയറ്റിയെന്നും, പ്രവര്ത്തന മികവും അര്ഹതയും പരിഗണിച്ചില്ലെന്നുമാണ് ഇരുവരുടേയും ആരോപണം.
സുധാകരന് ഹൈകമാന്ഡിന് കൈമാറിയ ഡി.സി.സി പ്രസിഡന്റുമാരുടെ ലിസ്റ്റ് അംഗീകരിക്കാനാവില്ലെന്ന് ഉമ്മന് ചാണ്ടിയും ചെന്നിത്തലയും ഹൈക്കമാന്ഡിനെ അറിയിച്ചു. ഇത് പാര്ട്ടിയ്ക്ക് ഗുണം ചെയ്യില്ലെന്നും നേതാക്കള് പറഞ്ഞു. മാത്രമല്ല, പുതിയ ഗ്രൂപ്പ് ഉണ്ടാക്കാനുള്ള ശ്രമമാണ് നടക്കുന്നതെന്നും ഹൈക്കമാന്ഡിനെ ഇരുവരും അറിയിച്ചു.
ഗ്രൂപ്പ് അടിസ്ഥാനത്തിലുള്ള വീതം വെപ്പ് വേണ്ടെന്ന് ഹൈക്കമാന്ഡ് നേരത്തേ തന്നെ നിര്ദേശം നല്കിയിരുന്നു. കഴിവായിരിക്കണം മാനദണ്ഡമെന്നും പട്ടികയില് യുവാക്കളുടെ കൂടുതല് പങ്കാളിത്തം വേണമെന്നും രാഹുല് ഗാന്ധി പറഞ്ഞു. ഈ മാസം അവസാനത്തോടെ അന്തിമ പട്ടിക പ്രഖ്യാപിക്കും. അതിന് ശേഷം മാത്രമേ കെ.പി.സി.സി ഭാരവാഹി പട്ടിക ചര്ച്ചകളിലേക്ക് കടക്കൂ. സാമുദായിക പരിഗണനകള് കൂടി കണക്കിലെടുത്തേക്കും.
