കൊച്ചി : യു.ഡി.എഫിന് ഭരണം കിട്ടിയാല് മുഖ്യമന്ത്രിയാകുവാന് ഏറ്റവും യോഗ്യന് രമേശ് ചെന്നിത്തല തന്നെ. പ്രതിപക്ഷ നേതാവ് എന്ന നിലയില് വി.ഡി.സതീശന്റെ പ്രവര്ത്തനം വളരെ മികച്ചതായിരുന്നുവെന്നും അഭിപ്രായ സര്വ്വേ. കെ.സി.വേണുഗോപാല് കേരള രാഷ്ട്രീയത്തില് വരുന്നതിനോടും മുഖ്യമന്ത്രി ആകുന്നതിനോടും ഭൂരിപക്ഷംപേരും അനുകൂലിക്കുന്നില്ല. തര്ക്കങ്ങള്ക്കും ഗ്രൂപ്പ് വഴക്കുകള്ക്കും ഇത് കാരണമാകുമെന്ന ആശങ്ക പലരും പങ്കുവെച്ചു. കേരളത്തിലും പുറത്തുമുള്ള മലയാളികളില് നിന്നും ലഭിച്ച അഭിപ്രായങ്ങള് ക്രോഡീകരിച്ചപ്പോഴാണ് ജനഹിതം വ്യക്തമായത്. പിണറായി സര്ക്കാര് മൂന്നാമതും അധികാരത്തില് വരുന്നതിനോട് പാര്ട്ടി പ്രവര്ത്തകരില് പലര്ക്കും താല്പ്പര്യമില്ല. ഒരിക്കല്ക്കൂടി അധികാരത്തിലെത്തിയാല് പാര്ട്ടി കേരളത്തില് നാമാവശേഷമാകുമെന്ന ചിന്ത പലരിലും ഉടലെടുത്തിട്ടുണ്ട്.
വി.ഡി. സതീശനെ ഒരു കര്ക്കശ്ശക്കാരനായ നേതാവായി കാണുമ്പോള് ചെന്നിത്തലയെ സൌമ്യനും ശാന്തനുമായാണ് മിക്കവരും കാണുന്നത്. സമീപകാല രാഷ്ട്രീയത്തില് പ്രതിപക്ഷ നേതാവ് എന്ന നിലയില് വി.ഡി.സതീശന് വളരെ ശക്തനായിരുന്നു. എന്നാല് മുഖ്യമന്ത്രിയായി വി.ഡി.സതീശന് വരുന്നത് പാര്ട്ടിക്ക് ഒട്ടും ഗുണകരമാകില്ലെന്നാണ് വിലയിരുത്തല്. മുതിര്ന്ന നേതാവായ ചെന്നിത്തലയുടെ രാഷ്ട്രീയ പ്രവര്ത്തന പരിചയവും സമൂഹത്തിലെ നാനാതുറകളില്പ്പെട്ടവരുമായുള്ള സൗഹൃദവും മത നേതാക്കന്മാരുമായിട്ടുള്ള ആത്മബന്ധവും യു.ഡി.എഫ് ഭരണത്തിന് ഏറെ ഗുണകരമാകുമെന്നാണ് മിക്കവരുടെയും വിലയിരുത്തല്.
