ഡൽഹി : മുൻ ചീഫ് ജസ്റ്റിസ് രഞ്ജൻ ഗൊഗോയിയെ രാഷ്ട്രപതി രാജ്യസഭാ അംഗമായി നാമനിർദേശം ചെയ്തതിന് രണ്ട് മാസം മുമ്പു തന്നെ അദ്ദേഹത്തിന്റെ സഹോദരനും ലഭിച്ചു പദവി. ഗൊഗോയിയുടെ മൂത്ത സഹോദരൻ റിട്ട. എയർ മാർഷൽ അഞ്ജൻ ഗൊഗോയിയെ ആണ് രാഷ്ട്രപതി ഭവൻ സഹമന്ത്രിക്ക് സമാനമായ പദവിയിലേക്ക് നാമനിർദേശം ചെയ്തിരിക്കുന്നത്.
നോർത്ത് ഈസ്റ്റ് റീജിയൺ മന്ത്രാലയത്തിന്റെ കീഴിലുള്ള വടക്കുകിഴക്കൻ സംസ്ഥാനങ്ങളുടെ സാമ്പത്തികവും സാമൂഹികവുമായ വികസനത്തിനുള്ള നോഡൽ ഏജൻസിയായ എൻ.ഇ.സിയിലെ ഒരു മുഴുവൻ സമയ അംഗമായിട്ടാണ് അഞ്ജൻ ഗൊഗോയിയെ നാമനിർദേശം ചെയ്തത്. ദി വൈറാണ് ഇക്കാര്യം റിപ്പോർട്ട് ചെയ്തിരിക്കുന്നത്.
എൻ.ഇ.സിയുടെ 40 വർഷത്തെ ചരിത്രത്തിൽ ആദ്യമായിട്ടാണ് വിരമിച്ച ഒരു പ്രതിരോധ ഉദ്യോഗസ്ഥനെ രാഷ്ട്രപതി ഈ പദവിയിലേക്ക് നാമനിർദേശം ചെയ്യുന്നത്. 2013-ഫെബ്രുവരിയിലാണ് അഞ്ജൻ ഗൊഗോയി വ്യോമസേനയിൽ നിന്ന് വിരമിക്കുന്നത്. എൻ.ഇ.സി. അംഗമായി മൂന്നു വർഷത്തേക്കാണ് അദ്ദേഹത്തെ നിയമച്ചിരിക്കുന്നതെന്ന് ജനുവരി 24-ന് ഇറങ്ങിയ കേന്ദ്ര സർക്കാർ വിജ്ഞാപനത്തിൽ പറയുന്നുണ്ട്.
അതേ സമയം രഞ്ജൻ ഗൊഗോയി ഇന്ന് രാജ്യസഭാ അംഗമായി സത്യപ്രതിജ്ഞ ചെയ്യും. അസമിൽ നിന്ന് ഇന്നലെ രാത്രിയോടെ അദ്ദേഹം ഡൽഹിയിലെത്തിയിട്ടുണ്ട്.
