റാന്നി: അയ്യപ്പഭാഗവത മഹാസത്രത്തിന്റെ മുന്നോടിയായി നടക്കുന്ന നാരായണീയ പാരായണ യജ്ഞം വൃശ്ചികം ഒന്നു മുതൽ വൈക്കം മണികണ്ഠനാൽത്തറയിൽ ആരംഭിക്കും.ഡിസംബർ 15 മുതൽ 28 വരയാണ് റാന്നി വൈക്കം മണികണ്ഠനാൽത്തറയിലെ തിരുവാഭരണപാതയിൽ പ്രത്യേകം തയ്യാറാക്കിയ വേദിയിൽ ആണ് അഖിലഭാരത ശ്രീമദ് അയ്യപ്പഭാഗവത മഹാസത്രം നടക്കുക. ഇതിന് മുന്നോടിയായി വ്യശ്ചികം ഒന്ന് മുതൽ നാരായണീയ പാരായണവും ശബരിമല തീർത്ഥാടകർക്ക് അന്നദാനവും മണികണ്ഠനാൽത്തറയിൽ ആരംഭിക്കും.
സത്രം രക്ഷാധികാരിയും ശബരിമല തന്ത്രിയുമായ ബ്രഹ്മശ്രീ കണ്ഠരര് രാജീവരര് , രക്ഷാധികാരിയും പന്തളം കൊട്ടാര നിർവ്വാഹസംഘം സെക്രട്ടറിയുമായ പി.എൻ നാരായണവർമ്മ, അയിരൂർ ചെറുകോൽപ്പുഴ ജ്ഞാനാനന്ദാശ്രമം മഠാധിപതി സ്വാമിനി സംഗമേശാനന്ദ സരസ്വതി എന്നിവർ വ്യശ്ചികം ഒന്നിന് ദീപം തെളിയിച്ച് ഉദ്ഘാടന കർമ്മം നിർവ്വഹിക്കും.കേരളത്തിന്റെ വിവിധ ഭാഗങ്ങളിൽ നിന്നുള്ള നാരായണീയ സമിതികൾ പങ്കെടുക്കുന്നതിനുള്ള രജിസ്ട്രേഷൻ ആരംഭിച്ചു. ഇതുവരെ 39 സമിതികൾ രജിസ്ട്രേഷൻ നടത്തി.
സത്രവേദിയിൽ ഡിസംബർ 25 ന് നടക്കുന്ന മഹാനാരായണീയ സംഗമത്തിൽ കേരളത്തിന്റെ വിവിധയിടങ്ങളിൽ നിന്നായി നിരവധി പേർ പങ്കെടുക്കും.26,27 തീയതികളിൽ നവാവരണകൃതി സംഗീതാർച്ചനയോടുകൂടിയ നവഗ്രഹപൂജയും മുത്തുസ്വാമി ദീക്ഷിതരുടെ കമലാംബാൾ നവാവരണകൃതിയോടെയുള്ള ശ്രീചക്രപൂജയും നടക്കും.
