റാന്നി: ശബരിമല തീർത്ഥാടനവുമായി ബന്ധപ്പെട്ട് അക്ഷയ ഇൻഫർമേഷൻ സെന്റർ ആരംഭിക്കാന് തീരുമാനം. ഈ വർഷത്തെ ശബരിമല തീർത്ഥാടനത്തോടനുബന്ധിച്ച് പെരുനാട്, വടശ്ശേരിക്കര, റാന്നി പഴവങ്ങാടി ഗ്രാമപഞ്ചായത്തുകളിലെ അക്ഷയ കേന്ദ്രങ്ങൾ ആണ് ഇൻഫർമേഷൻ സെന്ററുകളായി പ്രവർത്തിപ്പിക്കുന്നത്. ഐടി മിഷൻ ജില്ലാ പ്രോജക്ട് മാനേജർ ആണ് വിവരം അറിയിച്ചത്. മടത്തുംമൂഴി, തുലാപ്പള്ളി, വടശ്ശേരിക്കര, റാന്നി ഇട്ടിയപ്പാറ എന്നീ അക്ഷയ കേന്ദ്രങ്ങളാണ് തീർത്ഥാടകരുടെ സൗകര്യാർത്ഥം ഇൻഫർമേഷൻ സെന്ററുകളായി പ്രവർത്തിക്കുക.
വെർച്ചൽ ക്യൂ ബുക്കിംഗ്, റെയിൽവേ ടിക്കറ്റ് , വിമാന യാത്ര ടിക്കറ്റ്, കെഎസ്ആർടിസി ടിക്കറ്റ് എന്നിവ ബുക്ക് ചെയ്യുന്നതിനുള്ള സൗകര്യവും ആധാർ, മൊബൈൽ റീചാർജിംഗ് തുടങ്ങിയ സേവനങ്ങളും അക്ഷയ ഇൻഫർമേഷൻ സെന്ററുകളിൽ ലഭ്യമാകും. കൂടാതെ തീർത്ഥാടകർക്ക് ആവശ്യമായ വിവരങ്ങൾ നൽകുന്നതിനുള്ള സൗകര്യം ഒരുക്കും. അക്ഷയ സംരംഭകരായ എൻ. കൃഷ്ണദാസ്, കെ. വി ബിനു, റ്റി.വി കുര്യൻ, കെ.രാധാകൃഷ്ണൻ നായർ എന്നിവരുടെ നേതൃത്വത്തിലാണ് അക്ഷയ ഇൻഫർമേഷൻ സെന്ററുകൾ പ്രവർത്തിക്കുന്നത്.
