റാന്നി : പ്രകൃതിദുരന്തത്തിന്റെയും വെള്ളപ്പൊക്കത്തിന്റെയും വറുതിക്കിടയിലും സമൂഹത്തിലെ ഏറ്റവും പിന്നോക്കം നിൽക്കുന്ന ജനവിഭാഗങ്ങൾക്ക് കൈത്താങ്ങായി റാന്നി ഗ്രാമപഞ്ചായത്ത്. ഓണാഘോഷത്തോടനുബന്ധിച്ച് പഞ്ചായത്തിലെ 16 അതിദരിദ്ര കുടുംബങ്ങൾക്കുള്ള സ്പെഷ്യൽ ഓണക്കിറ്റുകളും 115 ആശ്രയ ഗുണഭോക്താക്കൾക്കുള്ള കിറ്റുകളും സമയബന്ധിതമായി വിതരണം ചെയ്ത് റാന്നി ഗ്രാമപഞ്ചായത്ത് ഭരണസമിതി മാതൃകയായി. ദുരിതപൂർണ്ണമായ സാഹചര്യത്തിലും ഒരു കുടുംബം പോലും പട്ടിണി കിടക്കരുത് എന്ന ലക്ഷ്യത്തോടെയാണ് പഞ്ചായത്ത് ഈ പദ്ധതി നടപ്പിലാക്കിയത്.
ഓണത്തിന് അത്യാവശ്യമായ നിത്യോപയോഗ സാധനങ്ങളും ഭക്ഷ്യധാന്യങ്ങളും ഉൾപ്പെടുത്തിയ വിപുലമായ കിറ്റുകളാണ് ഗുണഭോക്താക്കളുടെ വീടുകളിൽ നേരിട്ടും പ്രത്യേക വിതരണ കേന്ദ്രങ്ങൾ വഴിയും എത്തിച്ച് നൽകിയത്. വെള്ളപ്പൊക്കം സൃഷ്ടിച്ച സാമ്പത്തിക ബുദ്ധിമുട്ടുകൾക്കിടയിലും സമൂഹത്തിലെ ദുർബല വിഭാഗങ്ങളെ ചേർത്തുപിടിക്കാനും അവരെ ഓണാഘോഷത്തിന്റെ സന്തോഷത്തിലേക്ക് കൊണ്ടുവരാനും സാധിച്ചതിൽ അഭിമാനമുണ്ടെന്ന് പഞ്ചായത്ത് അധികൃതർ പറഞ്ഞു. ജനപ്രതിനിധികളുടെയും ഐ.സി.ഡി.എസ്, കുടുംബശ്രീ പ്രവർത്തകരുടെയും സജീവ പങ്കാളിത്തത്തിലാണ് കിറ്റ് വിതരണം വേഗത്തിൽ പൂർത്തിയാക്കുവാന് സാധിച്ചത്.
