റാന്നി : വലിയകുളം – കാക്കമല റോഡ് തകർന്ന് ഗതാഗതം തടസപ്പെട്ടിട്ട് നാളേറെയായെങ്കിലും പഞ്ചായത്ത് അധികൃതർ തിരിഞ്ഞ് നോക്കുന്നില്ലന്ന് നാട്ടുകാരുടെ പരാതി. കാക്കമലയിലും പരിസര പ്രദേശങ്ങളിലും താമസിക്കുന്നവരുടെ ഏക ആശ്രമാണ് ഈ റോഡ്.
നാറാണംമൂഴി പഞ്ചായത്തിൽപ്പെട്ട ഈ പ്രദേശത്തെ വികസന പ്രവർത്തനങ്ങളോട് പഞ്ചായത്ത് അധികൃതർ തികഞ്ഞ അവഗണനയാണ് കാണിക്കുന്നതെന്ന് നാട്ടുകാര് പറയുന്നു. ജനപ്രതിനിധികളും തിരിഞ്ഞുനോക്കുന്നില്ല. റോഡ് തകരുവാൻ പ്രധാനകാരണം അനുവദനീയമായതിലും കൂടുതൽ ഭാരവുമായി സമീപത്തെ സിമന്റ് ഗോഡൗണിലേക്ക് ലോറികള് വരുന്നതു മൂലമാണെന്ന് സമീപവാസികള് പറയുന്നു. കഴിഞ്ഞ 4 വർഷമായി കാൽനടയാത്രക്കുപോലും ഈ റോഡില് ബുദ്ധിമുട്ടാണ്. ഇരുചക്ര വാഹനങ്ങൾ ഇവിടെ സ്ഥിരമായി അപകടത്തില്പ്പെടുന്നുണ്ട്.
നാറാണംമൂഴി പഞ്ചായത്ത് ഓഫീസിൽ നാട്ടുകാരെത്തി നിരവധി പരാതികള് നല്കിയിരുന്നു. ഒന്നിനും ഒരു നടപടിയും ഉണ്ടായിട്ടില്ല. പഞ്ചായത്തിന്റെ അനാസ്ഥയില് പ്രതിഷേധിച്ച് വലിയകുളം- കാക്കമല നിവാസികൾ പ്രക്ഷോഭത്തിന് ഒരുങ്ങുകയാണ്.
