റാന്നി: നാടന് തോക്ക് അനധികൃതമായി കൈവശം വെച്ചതിന് യുവാവിനെ പോലീസ് അറസ്റ്റു ചെയ്തു. ചേത്തയ്ക്കല് പാറേക്കടവ് ചക്കിട്ടയില് തോമസ് വര്ഗീസിന്റെ മകന് ജോജി വര്ഗീസ്(37) ആണ് റാന്നി പോലീസിന്റെ പിടിയിലായത്.
ശനിയാഴ്ച രാത്രി ഏഴോടെ വീടിനു സമീപത്തെ റബ്ബര് തോട്ടത്തില് നിന്നാണ് ഇയാളെ പിടികൂടിയത്. നാടന് തോക്കുമായി പാറേക്കടവു ഭാഗത്തെ റബ്ബര് തോട്ടത്തില് ഇയാള് നില്ക്കുന്ന കണ്ടതായുള്ള വിവരം വെച്ചൂച്ചിറ പോലീസിനെ സമീപത്തെ സ്ത്രീകള് അറിയിച്ചിരുന്നു. തോക്കുമായി നില്ക്കുന്നതായി കണ്ട സ്ഥലം റാന്നി പോലീസ് പരിധിയിലായതിനാല് വെച്ചൂച്ചിറ പോലീസ് വിവരം റാന്നിയിലേക്ക് കൈമാറുകയായിരുന്നു.
മാടത്തരുവിക്ക് സമീപത്തു നിന്നും ചാക്കില് ഉപേക്ഷിച്ച നിലയില് കണ്ട തോക്കാണിതെന്നും കൗതുകത്തിന് എടുത്തതാണെന്നുമാണ് ഇയാള് പോലീസിനോടു പറഞ്ഞത്. എന്നാല് മാടത്തരുവി, ഇടമുറി, റബ്ബര് ബോര്ഡ് മേഖലയില് കാട്ടുപന്നിയെ വേട്ടയാടുന്ന സംഘം സജീവമാണെന്നും ഇയാള് ഈ സംഘത്തില് അംഗമാണോയെന്ന് പരിശോധിക്കുമെന്നും പോലീസ് പറഞ്ഞു. കോടതിയില് ഹാജരാക്കിയ പ്രതിയെ റിമാന്ഡു ചെയ്തു.
