യു.പി: പരോളില് പുറത്തിറങ്ങിയ പിതാവിന്റെ ക്രൂരമായ പെരുമാറ്റത്തില് മനംനൊന്ത് ഉത്തര്പ്രദേശില് രണ്ടു സഹോദരിമാര് വിഷം കഴിച്ചു. ഇവരില് ഒരാള് മരിച്ചു. ബന്ദ മേഖലയിലുള്ള പര്ഹ്രി ഗ്രാമത്തിലാണു സംഭവം. വിഷം കഴിച്ചതായി കണ്ടെത്തിയതിനെത്തുടര്ന്ന് സഹോദരിമാരെ ബന്ദ മെഡിക്കല് കോളജില് എത്തിച്ചെങ്കിലും 21 വയസുള്ള പ്രിയങ്ക തിങ്കളാഴ്ച മരിക്കുകയായിരുന്നു. ഇളയ സഹോദരി സ്വപ്ന (19) ചികിത്സയിലാണ്.
ഇവരുടെ അമ്മ രേഖാദേവി പോലീസില് പരാതി നല്കി. ഭര്ത്താവ് മല്ഖാന് സിങ്, ഭര്തൃസഹോദരന്മാരായ സുരേഷ്, രാജേഷ് എന്നിവര്ക്കെതിരേയാണ് പരാതി. ഇതിന്റെ അടിസ്ഥാനത്തില് പെണ്കുട്ടികളുടെ പിതാവിനെ അറസ്റ്റ് ചെയ്തതായി പോലീസ് അറിയിച്ചു. ഇയാള്ക്കും സഹോദരന്മാര്ക്കുമെതിരേ ആത്മഹത്യാ പ്രേരണയ്ക്കു കേസെടുത്തു. മൂന്നുപേരും തന്നെയും പെണ്മക്കളെയും മര്ദിക്കുകയും നാടന് പിസ്റ്റള് കാണിച്ച് ഭീഷണിപ്പെടുത്തുകയും ചെയ്യാറുണ്ടെന്ന് രേഖാദേവിയുടെ പരാതിയില് പറയുന്നു.
വീട്ടില് ഭക്ഷണം പാകം ചെയ്യാന്പോലും അനുവദിച്ചിരുന്നില്ലെന്നും പറയുന്നുണ്ട്. 16 വര്ഷം മുമ്പ് നടന്ന ഇരട്ടക്കൊലപാതക കേസില് ജീവപര്യന്തം തടവിനു ശിക്ഷിക്കപ്പെട്ട പ്രതികള് ആറു മാസം മുമ്പ് പരോളില് ഇറങ്ങിയതാണ്. ഇവരുടെ പീഡനങ്ങള് സഹിക്കാനാവാതെ ഞായറാഴ്ച രാത്രി സഹോദരിമാര് വിഷം കഴിക്കുകയായിരുന്നെന്ന് അഡീഷണല് പോലീസ് സൂപ്രണ്ട് ലക്ഷ്മി നിവാസ് മിശ്ര പറഞ്ഞു.
