കൊല്ലം: പ്രായപൂര്ത്തിയാകാത്ത പെണ്കുട്ടിയെ ജോത്സ്യന് ലൈംഗികാതിക്രമത്തിന് ഇരയാക്കിയത് പ്രണയത്തില് നിന്നും പിന്മാറാന് വേണ്ടി പെണ്കുട്ടിയുടെ മനസ് മാറാന് ചരട് ജപിച്ച് നല്കിയ ശേഷം. കൊല്ലം പരവൂര് പൂതക്കുളം അംബികാ മേക്കപ്പ് ജംഗ്ഷന് സമീപം തിരുവോണം വീട്ടില് താമസിക്കുന്ന വിജയകുമാറാണ് പോക്സോ കേസില് അറസ്റ്റിലായത്. പരവൂര് പോലീസാണ് കഴിഞ്ഞ ദിവസം ഇയാളെ അറസ്റ്റ് ചെയ്തത്.
പെണ്കുട്ടി ഇരുപത്തിയഞ്ചുകാരനായ യുവാവുമായി പ്രണയത്തിലായിരുന്നു. ഈ ബന്ധം പെണ്കുട്ടിയുടെ വീട്ടുകാര് അറിഞ്ഞു. ഇതോടെ പെണ്കുട്ടിയെ പ്രണയത്തില് നിന്നും പിന്തിരിപ്പിക്കാനായി പല പണികളും നോക്കി. ഇതിനിടയിലാണ് പെണ്കുട്ടിയെ ജോത്സ്യന്റെ അടുത്ത് എത്തിക്കുന്നത്. പ്രണയബന്ധത്തില് നിന്നും മകളെ പിന്മാറ്റാനായി അമ്മയാണ് പെണ്കുട്ടിയുമായി അംബികാ ജംഗ്ഷന് സമീപമുള്ള ജോത്സ്യന്റെ വീട്ടിലെത്തിയത്.
യുവാവുമായുള്ള ബന്ധം ഒഴിവാക്കാന് പെണ്കുട്ടിക്ക് ചരട് ജപിച്ച് കെട്ടിയ ശേഷം ഇയാള് കടന്നുപിടിച്ച് ലൈംഗികാതിക്രമം നടത്തുകയായിരുന്നു. പെണ്കുട്ടിയുടെ മൊഴിയുടെ അടിസ്ഥാനത്തില് രജിസ്റ്റര് ചെയ്ത കേസിലാണ് ജോത്സ്യനെ അറസ്റ്റ് ചെയ്തത്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു. ചാത്തന്നൂര് അസി. പോലീസ് കമ്മീഷണര് ഗോപകുമാറിന്റെ നിര്ദ്ദേശാനുസരണം പരവൂര് ഇന്സ്പെക്ടര് എ. നിസാറാണ് പ്രതിയെ അറസ്റ്റ് ചെയ്തത്.
