രാജസ്ഥാൻ : രാജസ്ഥാനിൽ പതിനഞ്ച് വയസുള്ള പട്ടികവർഗ പെൺകുട്ടിയെ ബലാൽസംഗം ചെയ്ത് കൊലപ്പെടുത്തിയ കേസിൽ രണ്ട് പ്രതികൾക്ക് തൂക്കുകയർ വിധിച്ച് പോക്സോ കോടതി. ബുണ്ടി ജില്ലയിലെ പോക്സോ കോടതിയാണ് ശിക്ഷ വിധിച്ചത്. പ്രതികളായ സുൽത്താൻ ഭീൽ, ചോട്ടു ലാൽ ഭീൽ എന്നിവർ ഒരുലക്ഷത്തി ഇരുപതിനായിരം രൂപ വീതം പിഴയൊടുക്കണമെന്നും ജഡ്ജി ബാൽകൃഷൻ മിശ്ര ഉത്തരവിട്ടു.
കഴിഞ്ഞ ഡിസംബർ 23നാണ് പെൺകുട്ടിയുടെ മൃതദേഹം വനത്തിനുള്ളിൽ കണ്ടെത്തിയത്. പന്ത്രണ്ട് മണിക്കൂറിനകം പൊലീസ് രണ്ട് പ്രതികളെയും പിടികൂടിയിരുന്നു. ഇവരെ ചോദ്യം ചെയ്തപ്പോൾ പ്രായപൂർത്തിയാകാത്ത മൂന്നാമതൊരാൾക്ക് കൂടി കുറ്റകൃത്യത്തിൽ പങ്കുണ്ടെന്ന് കണ്ടെത്തി. ഇയാളുടെ വിചാരണ ജുവനൈൽ ജസ്റ്റിസ് ബോർഡിന് മുന്നിൽ പുരോഗമിക്കുകയാണ്.
