കുവൈത്ത് സിറ്റി: പ്രകൃതിയുടെ അത്ഭുതകരമായ അതിജീവന തന്ത്രങ്ങളിൽ ഒന്നിന് വീണ്ടും സാക്ഷിയായി കുവൈത്ത്. വംശനാശഭീഷണി നേരിടുന്നതും ലോകത്ത് അപൂർവമായി മാത്രം കണ്ടുവരുന്നതുമായ ‘യൂറേഷ്യൻ ട്രീ ഔൾ’ വർഗത്തിൽപ്പെട്ട മൂങ്ങകൾ കുവൈത്തിലെത്തിയതായി പരിസ്ഥിതി പൊതു അതോറിറ്റി അറിയിച്ചു. ദേശാടന യാത്രയ്ക്കിടെയുള്ള വിശ്രമത്തിനായാണ് ഇവ രാജ്യത്തെത്തുന്നതെന്നും, ഇവയെ ഉപദ്രവിക്കുകയോ പിടികൂടാൻ ശ്രമിക്കുകയോ ചെയ്യുന്നത് നിയമവിരുദ്ധമാണെന്നും അധികൃതർ മുന്നറിയിപ്പ് നൽകി.
വർഷത്തിൽ രണ്ടുതവണയാണ് ഈ അപൂർവ പക്ഷികൾ കുവൈത്തിലെത്തുന്നത്. സെപ്റ്റംബർ-ഒക്ടോബർ മാസങ്ങളിലാണ് ആദ്യ സന്ദർശനം. തുടർന്ന് മാർച്ച്-ഏപ്രിൽ മാസങ്ങളിൽ മടക്കയാത്രയ്ക്കിടെയും ഇവയെ കാണാൻ സാധിക്കും. താഴ്ന്ന് പറക്കുന്ന സ്വഭാവമുള്ളതിനാൽ പാർക്കുകളിലും പാർപ്പിട മേഖലകളിലുമുള്ള മരങ്ങളിലും വീടുകൾക്ക് സമീപവുമാണ് ഇവ കൂടുതലായി കാണപ്പെടുന്നത്.
