റാന്നി : കുത്തനെയുള്ള കയറ്റവും മഴക്കാലത്ത് യാത്ര ദുർഘടവുമായിരുന്ന റേഷൻകട – മണ്ണാറത്തറ റോഡിന് ഒരു കൈത്താങ്ങ്. റാന്നി- അങ്ങാടി ഗ്രാമ പഞ്ചായത്ത് നേതൃത്വത്തിൽ റോഡരികിൽ കൈവരികൾ സ്ഥാപിച്ചു. വർഷങ്ങൾക്ക് മുമ്പ് നിർമാണം പൂർത്തിയാക്കിയ റോഡാണിതെങ്കിലും കാൽനടയാത്ര പോലും ദുസഹമായിരുന്നു. മഴക്കാലത്ത് പായൽ പിടിക്കുന്ന റോഡിൽ നിരവധി അപകടങ്ങളും നടന്നിട്ടുണ്ട്. 2വർഷം മുമ്പ് കുത്തനെയുള്ള ഇറക്കത്തിൽ നിയന്ത്രണം വിട്ട ഓട്ടോ റിക്ഷ ഇടിച്ച് ഒരു വൃദ്ധ മരണമടഞ്ഞിരുന്നു.
മണ്ണാറത്തറ നിവാസികൾ റേഷൻ കടയിലേക്ക് വരുന്നതിന് ഉപയോഗിച്ചിരിക്കുന്ന റോഡിൽ നിരവധി യാത്രക്കാർക്ക് കാൽ തെറ്റി വീണ് പരുക്ക് പറ്റിയിട്ടുണ്ട്. തുടർന്ന് വലിയകാവ് വാർഡ് വികസന സമിതി നൽകിയ നിവേദനത്തെ തുടർന്നാണ് പഞ്ചായത്തിന്റെ തനത് ഫണ്ടിൽ നിന്നും ഒന്നര ലക്ഷം രൂപ മുടക്കി റോഡിൽ കൈവരികൾ സ്ഥാപിച്ചത്. നവീകരിച്ച റോഡ് പഞ്ചായത്ത് പ്രസിഡന്റ അഡ്വ. ബിന്ദു റെജി ഉദ്ഘാടനം ചെയ്തു. ഗ്രാമ പഞ്ചായത്ത് അംഗം പി.എസ്.സതീഷ് കുമാർ അധ്യക്ഷത വഹിച്ചു. ബ്ലോക്ക് പഞ്ചായത്ത് അംഗം സുജ ബിനോയി, വാർഡ് വികസന സമിതി അംഗങ്ങളായ രാജൻ മാത്യു , തമ്പി പാസ്റ്റർ, എൻ.സനോജ്, ജിജി ടീച്ചർ, ഇ.ടി. കുഞ്ഞുമോൻ , ആഷിഷ് കുരുവിള, രാജൻ തൂളിമണ്ണിൽ എന്നിവർ പ്രസംഗിച്ചു.
