മലപ്പുറം : ഓട്ടോറിക്ഷയുടെ ആര്.സി പുതുക്കാന് ചെന്നയാളെ തിരിച്ചയച്ച സംഭവത്തില് തിരൂര് ജോ.ആര്.ടി.ഒ 10,000 രൂപ നഷ്ടപരിഹാരം നല്കണമെന്ന് ജില്ല ഉപഭോക്തൃ തര്ക്ക പരിഹാര കമ്മീഷന് വിധി. 2019 ഡിസംബറിലാണ് പരാതിക്ക് ആസ്പദമായ സംഭവം. തിരുനാവായ അനന്താവൂര് മെടിപ്പാറയിലെ ടി.കെ. മുഹമ്മദാണ് പരാതിക്കാരന്. സേവനത്തിലെ വീഴ്ച, ഉപഭോക്താവിനുണ്ടായ അസൗകര്യം, ചെലവ് ഇനങ്ങളിലാണ് 10,000 രൂപ നല്കേണ്ടതെന്ന് കമ്മീഷന് പ്രസിഡന്റ് കെ. മോഹന്ദാസന് ഉത്തരവില് വ്യക്തമാക്കി.
ഭാര്യയുടെ പേരിലുള്ള ഓട്ടോറിക്ഷയുടെ ആര്.സി പുതുക്കാനാണ് മുഹമ്മദ് ജോ. ആര്.ടി.ഒ ഓഫീസില് പോയത്. ചലാന് വാങ്ങിവെച്ച ക്ലര്ക്ക് നാല് ദിവസം കഴിഞ്ഞ് വീണ്ടും വരാന് ആവശ്യപ്പെടുകയായിരുന്നു. നാല് ദിവസത്തിന് ശേഷം ഓഫീസിലെത്തിയ മുഹമ്മദിനോട് അവിടെ സ്വീകരിക്കുന്നില്ലെന്ന് അറിയിച്ച് അക്ഷയ കേന്ദ്രം വഴി ചെയ്യണമെന്നും നിര്ദേശിച്ചു.
സോഫ്റ്റ്വെയറില് മാറ്റമുണ്ടെന്നും പുതുക്കാനാവില്ലെന്നുമായിരുന്നു അക്ഷയ കേന്ദ്രത്തില്നിന്ന് ലഭിച്ച മറുപടി. വീണ്ടും ഓഫീസില് ചെന്നപ്പോള് ജോ. ആര്.ടി.ഒ അനുവദിച്ചാല് സ്വീകരിക്കാമെന്ന് ക്ലര്ക്ക് വ്യക്തമാക്കി. ഇത് സാധ്യമാവാത്തതിനെത്തുടര്ന്ന് രണ്ട് ദിവസം കഴിഞ്ഞ് വീണ്ടും ചെന്നപ്പോള് 3000 രൂപ പിഴയോടെ അടക്കാനാണ് നിര്ദേശിച്ചതെന്ന് മുഹമ്മദ് പരാതിയില് പറയുന്നു. തുടര്ന്നാണ് 70,000 രൂപ നഷ്ടപരിഹാരം ആവശ്യപ്പെട്ട് ഇദ്ദേഹം ജില്ല ഉപഭോക്തൃ തര്ക്ക പരിഹാര കമ്മീഷനെ സമീപിച്ചത്.
