മലപ്പുറം: കര്‍ണാടക രജിസ്‌ട്രേഷനുള‌ള ജെസിബിയുടെ നമ്പര്‍ പ്ളേറ്റ് മാറ്റി കേരള രജിസ്‌ട്രേഷന്‍ വാഹനത്തിന്റെ നമ്പര്‍ പ്ളേറ്റ് വെച്ച്‌ ഉപയോഗിച്ചു. മലപ്പുറത്ത് തേഞ്ഞിപ്പലത്ത് അമ്പലപ്പടിയിലും ദേവതിയാലും ഉപയോഗിക്കുകയായിരുന്ന ഒരേ രജിസ്‌ട്രേഷനിലുള‌ള രണ്ട് ജെസിബികളും പിടികൂടി. മലപ്പുറം അസിസ്‌റ്റന്റ് മോട്ടോര്‍ വെഹിക്കിള്‍ ഇന്‍സ്‌പെക്‌ടര്‍മാരുടെ നേതൃത്വത്തിലാണ് ഇരുവാഹനങ്ങളും പിടിച്ചെടുത്തത്. എംവിഡി എന്‍ഫോഴ്‌സ്മെന്റിന് കിട്ടിയ രഹസ്യ വിവരത്തെ തുടര്‍ന്നാണ് പരിശോധന നടത്തിയത്.
ഒരേ വ്യക്തിയുടെ കീഴിലുള‌ളതാണ് രണ്ട് ജെസിബിയെന്നും അന്വേഷണത്തില്‍ വ്യക്തമായിട്ടുണ്ട്. നികുതി വെട്ടിക്കാനും നിയമലംഘന പ്രവര്‍ത്തനം നടത്താനുമാണ് ഇത്തരത്തില്‍ ഒരേ നമ്പരില്‍ വാഹനങ്ങള്‍ സാധാരണ ഉപയോഗിക്കുന്നതെന്നാണ് വിവരം. അസി.വെഹിക്കിള്‍ ഇന്‍സ്‌പെക്‌ടര്‍മാര്‍ ഫിറോസ് ബിന്‍ ഇസ്‌മായില്‍, കെ.ആര്‍ ഹരിലാല്‍, എസ്.സുനില്‍ രാജ്, പി.കെ സയ്യിദ് മഹമൂദ്, വിജീഷ് വളേരി എന്നവരടങ്ങിയ രണ്ട് സ്‌ക്വാഡാണ് പരിശോധനകള്‍ നടത്തിയത്.
