വെണ്ണിക്കുളം : പടുതോട് രാജിവ് ഗാന്ധി ഗ്രന്ഥശാലയിലെ ബാലവേദിയുടെ ഒരാഴ്ച നീണ്ടു നിൽക്കുന്ന വായനക്കളരി ആരംഭിച്ചു. ‘മലയാളം പഠിക്കാം വായനയെ വരവേൽക്കാം ‘ എന്ന ലക്ഷ്യത്തോടെയാണ് പരിപാടി സംഘടിപ്പിച്ചിരിക്കുന്നത്. പുറമറ്റം ഗ്രാമപഞ്ചായത്ത് അംഗം ടി.കെ. സനിൽ കുമാർ വായനക്കളരി ഉദ്ഘാടനം ചെയ്തു. ഗ്രന്ഥശാല പ്രസിഡന്റ് പി.എ. വർഗീസ് അദ്ധ്യക്ഷത വഹിച്ചു. സ്റ്റേറ്റ് ലൈബ്രറി കൗൺസിൽ അംഗം നജീബ് റാവുത്തർ സ്വാഗതം ആശംസിച്ചു. യുവ കവിയും സാഹിത്യകാരനുമായ കാശിനാഥൻ മുഖ്യാതിഥിയായിരുന്നു.
ബാലവേദി മെന്റര് പി.കെ. റോഷ്ന, അനീഷ് പി.എസ്., ബിജു ജേക്കബ് കൈതാരം, ബാലാവേദി പ്രസിഡന്റ് കുമാരി ഫിദ എസ്. സലാം, സെക്രട്ടറി ഫാത്തിമ റഫീസ്, ബിജോ എ തോമസ്, ഹബീബ് റാവുത്തർ എന്നിവർ സംസാരിച്ചു. കുട്ടികൾക്ക് കവിതകൾ ചൊല്ലിക്കൊടുക്കുകയും അവർ ഏറ്റുപാടി ചൊല്ലുകയും ചെയ്തു. പത്തൊൻപതാം തീയതി ഞായറാഴ്ചയാണ് സമാപനം.
