പത്തനംതിട്ട : കെ – റെയിൽ സിൽവർ ലൈൻ വിരുദ്ധ ജനകീയ സമിതി പത്തനംതിട്ട ജില്ലാ കമ്മിറ്റിയുടെ ആഭിമുഖ്യത്തിൽ ഡിസംബർ 13-ന് ബുധനാഴ്ച 3.30-ന് ഇരവിപേരൂർ വൈ.എം.സി.എ-യിൽ വെച്ച് കേരള സംരക്ഷണത്തിനായുള്ള “യഥാർത്ഥ ജനകീയ സദസും പൗര പ്രമുഖരുമായുള്ള കൂടിക്കാഴ്ചയും” നടക്കും.
ജനാധിപത്യ ബോധവും സാമൂഹ്യപ്രതിബദ്ധതയുമുള്ള പൗരജനങ്ങളുടെ സംഗമമാണ് യഥാർത്ഥ ജനകീയ സദസ്സ്. നെൽ, റബർ, ക്ഷീര തുടങ്ങി എല്ലാ മേഖലകളിലെയും കർഷക പ്രതിനിധികളും കർഷകത്തൊഴിലാളികൾ, ഓട്ടോറിക്ഷാ തൊഴിലാളികൾ, ചെറുകിട വ്യാപാരികൾ, നിർമ്മാണത്തൊഴിലാളികൾ, ആനുകൂല്യങ്ങൾ നിഷേധിക്കപ്പെട്ട വിവിധ വിഭാഗങ്ങളിൽപെട്ടവരുമടക്കം എല്ലാ വിഭാഗമാളുകളുടെയും പ്രതിനിധികൾ “പൗരപ്രമുഖരുമായുള്ള കൂടിക്കാഴ്ചയുടെ” ഭാഗമായി അവരുടെ പ്രശ്നങ്ങളും ആവലാതികളും പങ്കുവെയ്ക്കും.
സമ്പന്നരുമായി കൂടിക്കാഴ്ച നടത്തുകയും പ്രാതൽ കഴിക്കുകയും ചെയ്യുന്ന മുഖ്യമന്ത്രിയുടെ പരിപാടിയിൽ നിന്ന് തീർത്തും വ്യത്യസ്തമാവും ഈ പരിപാടി. തുല്യ വോട്ട് അവകാശമുള്ള ഈ നാട്ടിൽ വമ്പന്മാർക്ക് പ്രത്യേക പദവിയും പരിഗണനയും അവകാശവും കൽപ്പിച്ച് നൽകുന്ന മുഖ്യമന്ത്രിയുടെ പൗരപ്രമുഖ കൂടിക്കാഴ്ചയിൽ നിന്ന് സാധാരണക്കാരുടെ പ്രതിനിധികളുടെ പങ്കാളിത്തം കൊണ്ട് ഈ ‘പൗര പ്രമുഖരുമായുള്ള കൂടിക്കാഴ്ച’ ശ്രദ്ധേയമാവും. വി. എം. സുധീരൻ പരിപാടി ഉദ്ഘാടനം ചെയ്യും. മുൻ എം.എൽ.എ. ജോസഫ് എം. പുതുശ്ശേരി, സിൽവർ ലൈൻ വിരുദ്ധ ജനകീയ സമിതി സംസ്ഥാന ജനറൽ കൺവീനർ എസ്. രാജീവൻ തുടങ്ങിയവർ പ്രസംഗിക്കും. ജില്ലാ കൺവീനർ മുരുകേഷ് നടക്കൽ അധ്യക്ഷത വഹിക്കും.
