തിരുവനന്തപുരം : സര്ക്കാര് റസ്റ്റ് ഹൗസുകളിലെ ബുക്കിങ് പൊതുജനങ്ങള്ക്ക് കൂടുതല് എളുപ്പമാക്കിയതോടെ രണ്ട് മാസത്തിനിടെ ലഭിച്ചത് 65 ലക്ഷത്തിലേറെ രൂപയുടെ വരുമാനമെന്ന് പൊതുമരാമത്ത് മന്ത്രി മുഹമ്മദ് റിയാസ്. 2021 നവംബര് ഒന്ന് മുതല് ഡിസംബര് 31 വരെ റസ്റ്റ്ഹൗസുകളില് നിന്ന് ലഭിച്ചത് 65,34,301 രൂപയാണ്. ഇതില് 52,57,368 രൂപയാണ് ഓണ്ലൈന് ബുക്കിങ്ങിലൂടെ ലഭിച്ചത്.
ഇക്കാലയളവില് 8,378 പേരാണ് ഓണ്ലൈനില് രജിസ്റ്റര് ചെയ്തതെന്ന് മന്ത്രി പറഞ്ഞു. പി.ഡബ്ല്യു.ഡി റസ്റ്റ് ഹൗസ് പ്രവര്ത്തനം കൂടുതല് കാര്യക്ഷമമാക്കുന്നതിന്റെ ഭാഗമായി ജീവനക്കാര്ക്ക് കിറ്റ്സില് നല്കുന്ന പരിശീലന പരിപാടി ഉദ്ഘാടനം ചെയ്യുകയായിരുന്നു അദ്ദേഹം. ജീവനക്കാര് റസ്റ്റ് ഹൗസിന്റെ ബ്രാന്ഡ് അംബാസഡര്മാരാണെന്ന് മന്ത്രി പറഞ്ഞു. അവരുടെ പെരുമാറ്റമാണ് റസ്റ്റ് ഹൗസുകളുടെ വികസനത്തെ വിജയിപ്പിക്കുക. അതിഥികളെ വീട്ടില് ഒരാള് വന്നതുപോലെ സ്വീകരിക്കാനും പരിചരിക്കാനുമുള്ള പരിശീലനമാണ് നല്കുന്നത്.
റസ്റ്റ്ഹൗസുകളില് മാറ്റങ്ങള് അനുഭവപ്പെടുന്നുണ്ട്. ശുചിത്വം, ഭക്ഷണം എന്നിവയുടെ ഗുണമേന്മ ഉറപ്പുവരുത്തുന്നുണ്ട്. ചില ഒറ്റപ്പെട്ട സംഭവങ്ങള് ശ്രദ്ധയില്പ്പെട്ടിട്ടുണ്ട്. പക്ഷേ, ഒറ്റപ്പെട്ട സംഭവങ്ങളോട് സര്ക്കാര് സന്ധി ചെയ്യില്ല. 140 മണ്ഡലങ്ങളിലും നിരീക്ഷക സംഘംത്തെ നിശ്ചയിച്ചിട്ടുണ്ട്. പൊതുമരാമത്ത് വകുപ്പിന്റെ പൊതു പ്രവൃത്തികള് മാത്രമല്ല കെട്ടിട വിഭാഗത്തിന്റെ പ്രവര്ത്തനങ്ങളുടെ പുരോഗതിയും ഈ സംഘം നിരീക്ഷിക്കുമെന്നും മന്ത്രി പറഞ്ഞു. ഹോസ്പിറ്റാലിറ്റി മാനേജ്മെന്റ്, ഹൗസ് കീപ്പിങ് മാനേജ്മെന്റ് തുടങ്ങിയ വിഷയങ്ങളിലാണ് ജീവനക്കാര്ക്ക് പരിശീലനം നല്കുന്നത്. ആദ്യഘട്ടത്തില് 32 പേരെയാണ് അഞ്ച് ദിവസത്തെ പരിശീലനത്തിന് തെരഞ്ഞെടുത്തിരിക്കുന്നത്.
