ആലപ്പുഴ : വിവാഹ അഭ്യർഥന നിരസിച്ചതിന്റെ പകയിൽ പെൺകുട്ടിയുടെ വീട് അടിച്ചുതകർത്ത യുവാവ് സ്വയരക്ഷയ്ക്കായി പോലീസിനെയും വട്ടംചുറ്റിച്ചു. വട്ടംചുറ്റിയ പോലീസ് അവസാനം തന്ത്രപരമായി യുവാവിനെ പൊക്കി. ആലപ്പുഴ അവലൂക്കുന്ന് ചിറ്റേഴത്ത് വടക്കേ കൊച്ചുതറ സഞ്ജുരാജിനെ(25)യാണ് മണ്ണഞ്ചേരി പോലീസ് അറസ്റ്റ് ചെയ്തത്.
യുവതിയെ മർദിച്ചതിനും സഞ്ജുവിനെതിരെ പോലീസ് കേസെടുത്തിട്ടുണ്ട്. മണ്ണഞ്ചേരിയിലുള്ള യുവതിയുടെ വീടിനുനേരെ കഴിഞ്ഞദിവസം രാത്രിയിലാണ് ആക്രമണം നടത്തിയത്. ഇതിനൊടൊപ്പംതന്നെ സമീപത്തെ വീടിന്റെ മുന്നിലിരുന്ന ചെടിച്ചട്ടികളും എറിഞ്ഞ് ഉടച്ചിരുന്നു. പരാതികൾ ലഭിച്ച പോലീസ് ആകെ ആശയകുഴപ്പത്തിലായി.
കഴിഞ്ഞയിടെ നടന്ന രാഷ്ട്രീയ കൊലപാതകങ്ങളുമായി ബന്ധപ്പെട്ടുള്ള അനിഷ്ടസംഭവങ്ങളുടെ തുടർച്ചയാണോ ഈ അക്രമങ്ങളുമെന്നുള്ള സംശയമായിരുന്നു പോലീസിന്. സഞ്ജുവിന്റ ഉദ്ദേശവും ഇതുതന്നെ ആയിരുന്നു എന്ന് മണ്ണഞ്ചേരി എസ്.എച്ച്.ഒ. പി.കെ. മോഹിത് പറഞ്ഞു. അതിനുവേണ്ടിയാണു സമീപ വീട്ടിലെ ചെടിച്ചട്ടിയും തകർത്തത്. പെൺകുട്ടിയിൽ നിന്നു വിവരങ്ങൾ ആരാഞ്ഞ പോലീസ് സഞ്ജുവിനെ കസ്റ്റഡിയിലെടുത്ത് ചോദ്യം ചെയ്തപ്പോൾ കുറ്റം സമ്മതിക്കുകയായിരുന്നു.
കഴിഞ്ഞദിവസം വിവാഹ അഭ്യർഥന നിരസിച്ചപ്പോൾ യുവതിയെ തടഞ്ഞുനിർത്തി ദേഹോപദ്രവം ഏൽപ്പിച്ചിരുന്നതായും പോലീസ് പറഞ്ഞു. എസ്.എച്ച്.ഒ. പി.കെ. മോഹിത്തിന്റെ നേതൃത്വത്തിൽ പ്രിൻസിപ്പൽ എസ്.ഐ. കെ.ആർ. ബിജു, സി.പി.ഒ.മാരായ ഷാനവാസ്, കൃഷ്ണകുമാർ, ഷൈജു, ഉല്ലാസ് എന്നിവർ ചേർന്നാണു പ്രതിയെ പിടികൂടിയത്.
