മുംബൈ : കേന്ദ്രസർക്കാർ തീരുമാനങ്ങളെ എതിർക്കുന്നതിന്റെയോ സർക്കാരിനെതിരെ മുദ്രാവാക്യം വിളിക്കുന്നതിന്റെയോ പേരിൽ ഒരു പൗരനെ നാടുകടത്താൻ കഴിയില്ലെന്ന് വ്യക്തമാക്കി ബോംബെ ഹൈക്കോടതി. സോഷ്യലിസ്റ്റ് ഡെമോക്രാറ്റിക് പാർട്ടി ഓഫ് ഇന്ത്യ (SDPI) ജനറൽ സെക്രട്ടറി സയീദ് അഹമ്മദ് അബ്ദുൾ വാഹിദ് ചൗധരിക്കെതിരായ നാടുകടത്തൽ ഉത്തരവ് റദ്ദാക്കിക്കൊണ്ടാണ് ജസ്റ്റിസ് മാധവ് ജാംദാർ അതിശക്തമായ നിരീക്ഷണങ്ങൾ നടത്തിയത്. പൗരന്മാരെ ഇന്ത്യൻ സർക്കാരിന്റെ അടിമകളാക്കുകയാണോ എന്ന് കോടതി ചോദിച്ചു. പ്രതിഷേധിക്കാനും വിയോജിപ്പുകൾ രേഖപ്പെടുത്താനുമുള്ള അവകാശം പൗരന്മാരുടെ മൗലികാവകാശമാണെന്ന് കോടതി ഓർമ്മിപ്പിച്ചു.
സംസ്ഥാന നിയമസഭയിൽ പ്രധാനപ്പെട്ട ജനകീയ പ്രശ്നങ്ങൾ ചർച്ച ചെയ്യുന്നതിന് പകരം കൂറുമാറ്റങ്ങളെക്കുറിച്ചാണ് ചർച്ച നടക്കുന്നതെന്നും, കേസുകൾ ഒഴിവാക്കാൻ ‘വാഷിംഗ് മെഷീൻ’ രാഷ്ട്രീയത്തിലേക്ക് മാറാമെന്നും കോടതി പരിഹസിച്ചു. പൗരത്വ നിയമഭേദഗതിക്കെതിരെയും ഗ്യാൻവാപി തർക്കവിഷയത്തിലും പ്രതിഷേധങ്ങൾ സംഘടിപ്പിച്ചതിന്റെ പേരിൽ അഞ്ച് എഫ്ഐആറുകൾ ചൂണ്ടിക്കാട്ടിയാണ് സയീദ് അഹമ്മദിനെ ഒരു വർഷത്തേക്ക് നാടുകടത്താൻ മുംബൈ പോലീസ് ഉത്തരവിട്ടിരുന്നത്. എന്നാൽ ഭരണഘടനയുടെ 19, 21 അനുച്ഛേദങ്ങൾ പ്രകാരം പൗരന്മാർക്ക് അഭിപ്രായ സ്വാതന്ത്ര്യത്തിനും അന്തസ്സോടെ ജീവിക്കാനും അവകാശമുണ്ടെന്നും സർക്കാരിനെ എതിർക്കുന്നത് നാടുകടത്താനുള്ള അടിസ്ഥാനമല്ലെന്നും ചൂണ്ടിക്കാട്ടി കോടതി ഈ ഉത്തരവ് റദ്ദാക്കി.
‘ബിജെപി സർക്കാർ മുർദാബാദ്’, ‘അമിത് ഷാ മുർദാബാദ്’ തുടങ്ങിയ മുദ്രാവാക്യങ്ങൾ വിളിച്ചതിന്റെ പേരിൽ എങ്ങനെയാണ് നാടുകടത്തൽ ഉത്തരവ് പുറപ്പെടുവിക്കുകയെന്ന് കോടതി ചോദിച്ചു. ഇത്തരം പ്രതിഷേധങ്ങൾ നാടുകടത്താനുള്ള കാരണമല്ലെന്നും കോടതി പറഞ്ഞു. പോലീസ് സേന മുഖ്യമന്ത്രിയുടെയോ പ്രധാനമന്ത്രിയുടെയോ സേവകരല്ലെന്നും മറിച്ച് അവർ പൊതുസേവകരാണെന്നും കോടതി പറഞ്ഞു. നിയമവിരുദ്ധമായ ഉത്തരവുകൾ പുറപ്പെടുവിക്കുന്ന ഉദ്യോഗസ്ഥർക്കെതിരെ പിഴ ചുമത്തുമെന്നും ജസ്റ്റിസ് ജാംദാർ മുന്നറിയിപ്പ് നൽകി. മഹാരാഷ്ട്രയിലെ നിലവിലെ രാഷ്ട്രീയ സാഹചര്യത്തെയും എംപിമാരും എംഎൽഎമാരും പാർട്ടി മാറുന്നതിനെയും കോടതി വാദത്തിനിടെ തമാശരൂപേണ വിമർശിച്ചു.
