പത്തനംതിട്ട : മല്ലപ്പള്ളി പാടിമണ്ണില് നിന്നും കാശ്മീരിലേയ്ക്ക് സൈക്കിളില് റിജോയുടെ യാത്ര തുടങ്ങി.പാടിമണ് പാറേമണിക്കുഴിയില് വീട്ടില് റിജോ ജോര്ജ് (26) ആണ് കാശ്മീരിലേക്ക് യാത്ര പുറപ്പെട്ടത്.ബുധനാഴ്ച രാവിലെ പതിനൊന്ന് മണിയോടെ മല്ലപ്പള്ളി ഗ്രാമപഞ്ചായത്ത് ഓഫിസിനു മുമ്പില് നിന്നും പഞ്ചായത്ത് പ്രസിഡന്റ് ഗീതാകുര്യക്കോസ് പ്ലാഗ് ഓഫ് ചെയ്ത് റിജോ യാത്ര ആരംഭിച്ചു. ഇലക്ട്രീഷ്യനായ റിജോയിക്ക് സൈക്കിള് യാത്ര ഹരമാണ്. കുട്ടിക്കാലം മുതലെ സൈക്കിളിനോടാണ് പ്രിയം ഏറെയും. 23,000 രുപ വിലയുള്ള ഗിയര് സൈക്കിള് വാങ്ങി കേരളത്തില് മലപ്പുറം, കണ്ണൂര്, കോഴിക്കോട്, പാലക്കാട് എന്നിവിടങ്ങളില് സൈക്കിളില് യാത്ര നടത്തി. പിന്നെ പരീക്ഷണാര്ഥം കേരളത്തിനു പുറത്തേക്കും യാത്ര തുടര്ന്നു. സേലം, കോയബത്തൂര്, കന്യാകുമാരി, ബാംഗ്ലൂര് എന്നിവിടങ്ങളിലും സൈക്കിളില് സഞ്ചരിച്ചു.
അന്നുമുതല് റിജോയിക്ക് മനസ്സില് തോന്നിയ സ്വപ്നമാണ് കാശ്മീര് യാത്ര. കഴിഞ്ഞ വര്ഷം യാത്രക്ക് ഒരുങ്ങിയെങ്കിലും കോവിഡ് യാത്ര മുടക്കി. ആരോഗ്യ സംരക്ഷണവും പല മേഖലയില്പ്പെട്ടവരെ കാണുവാനും അവരുടെ സംസ്ക്കാരം കണ്ടു പടിക്കുന്നതിനും യാത്ര ഉപകരിക്കുമെന്ന് റിജോ പറയുന്നു. ഒറ്റക്കുള്ള യാത്രയില് സുരക്ഷിതമെന്ന് തോന്നുന്ന സ്ഥലങ്ങളില് വിശ്രമിച്ച് യാത്ര തുടരും. 85 – 90 ദിവസം കൊണ്ട് കാശ്മിരിലെത്താനാണ് റിജോയുടെ ശ്രമം. യാത്രയുടെ ചെലവ് സ്വന്തമായി വഹിക്കുന്ന റിജോ ആരെങ്കിലും സ്പോണ്സര് മാരെ ലഭിക്കുമോ എന്ന് അന്വേഷണവും നടത്തുന്നുണ്ട്.
