തിരുവനന്തപുരം: നര്ത്തകനും അന്തരിച്ച നടന് കലാഭവന് മണിയുടെ സഹോദരനുമായ ആര്.എല്.വി.രാമകൃഷ്ണന് കേരള സംഗീത നാടക അക്കാദമിയില് നിന്നുണ്ടായ അധിക്ഷേപത്തിന്റെ പേരില് ആത്മഹത്യക്ക് ശ്രമിച്ച സംഭവത്തില് സംസ്ഥാന മനുഷ്യാവകാശ കമ്മീഷന് അന്വേഷണത്തിന് ഉത്തരവിട്ടു.
സാംസ്കാരി വകുപ്പ് പ്രിന്സിപ്പല് സെക്രട്ടറി അന്വേഷണം നടത്തി രണ്ടാഴ്ചക്കകം റിപ്പോര്ട്ട് സമര്പ്പിക്കണമെന്ന് കമ്മീഷന് ജുഡീഷ്യല് അംഗം പി.മോഹനദാസ് ഉത്തരവിട്ടു. കേരള സംഗീത നാടക അക്കാദമി അധ്യക്ഷയും അക്കാദമി സെക്രട്ടറിയും റിപ്പോര്ട്ട് ഹാജരാക്കണമെന്നും കമ്മീഷന് ആവശ്യപ്പെട്ടു.
ആര്.എല്.വി.രാമകൃഷ്ണന് മോഹിനിയാട്ടത്തില് ഡോക്ടറേറ്റ് ഉണ്ടെന്നും ദലിത് വിഭാഗത്തിലുള്ള ആളായതുകൊണ്ട് മാത്രമാണ് അദ്ദേഹം അക്കാദമിയുടെ ഓണ്ലൈന് ക്ലാസില് നിന്നും പിന്തള്ളപ്പെട്ടതെന്നും മനുഷ്യാവകാശ പ്രവര്ത്തകനായ ഡോ.ഗിന്നസ് മാടസ്വാമി സമര്പ്പിച്ച പരാതിയില് പറയുന്നു. പരാതിയില് കഴമ്പുണ്ടെന്ന് ഉത്തരവില് പറയുന്നു.
കഴിഞ്ഞ ദിവസമാണ് രാമകൃഷ്ണനെ അബോധാവസ്ഥയില് കണ്ടെത്തിയത്. അവശനിലയില് കണ്ടെത്തിയതിനെത്തുടര്ന്നാണ് അദ്ദേഹത്തെ ആശുപത്രിയില് പ്രവേശിപ്പിച്ചത്.
