റാന്നി: സംസ്ഥാന പാതയില് തീര്ത്ഥാടനം കഴിഞ്ഞു മടങ്ങിയ സംഘത്തിന്റെ വാഹനം കടയിലേക്ക് ഇടിച്ചു കയറിയുള്ള അപകടത്തില് ഒരാള് മരിച്ചു. അഞ്ചു പേര്ക്ക് പരിക്കേറ്റു. തെലുങ്കാന കെ.വി രംഗറെഢി സ്വദേശി രാജമല്ല ഗൗഡയുടെ മകന് ശ്രീഷെട്ടി രാജേഷ് ഗൗഡ(39) ആണ് മരിച്ചത്. പരിക്കേറ്റവരെ കോട്ടയം മെഡിക്കല് കോളേജ് ആശുപത്രിയിലും പാലായിലെ സ്വകാര്യ ആശുപത്രിയിലും പ്രവേശിപ്പിച്ചു. ഇന്നു രാവിലെ മൂന്നരയോടെ പുനലൂര് – മൂവാറ്റുപുഴ സംസ്ഥാന പാതയിലെ ഇട്ടിയപ്പാറ വലിയപറമ്പുപടിയിലാണ് സംഭവം. ഡ്രൈവര് ഉറങ്ങിപ്പോയതു മൂലമാണ് അപകടം.
തുലാപ്പള്ളി നാറാണംതോട്ടില് ശബരിമല സീസണ് കച്ചവടം നടത്തുന്ന സംഘമാണ് അപകടത്തില്പ്പെട്ടത്. കടയിലെ തൊഴിലാളികളും ബന്ധുക്കളുമാണ് വാഹനത്തില് ഉണ്ടായിരുന്നത്. സംഘം മണ്ഡലകാലപൂജ കഴിഞ്ഞ് നടയടച്ചതിനെ തുടര്ന്ന് അച്ചന്കോവില് ക്ഷേത്ര ദര്ശനവും ഉല്ലാസയാത്രയും പോയി മടങ്ങും വഴിയാണ് അപകടം. പതിനൊന്നു പേരടങ്ങുന്ന സംഘം സഞ്ചരിച്ച ട്രാവലര് വലിയപറമ്പുപടിയിലെ വ്യാപാര സ്ഥാപനത്തിലേക്ക് ഇടിച്ചു കയറുകയായിരുന്നു.
