റാന്നി : ബംഗ്ലാംകടവ് – ഇട്ടിയപ്പാറ റോഡിൽ ഒഴുവൻപാറയ്ക്ക് സമീപം റോഡരികിലെ ഓടയുടെ ഇരുമ്പ് മേൽമൂടി അലക്ഷ്യമായി നീക്കിവെച്ചിരിക്കുന്നത് യാത്രക്കാർക്ക് ഭീഷണിയാകുന്നു. പഴയ റോഡായിരുന്നപ്പോള് സമീപത്തെ വസ്തുവിലേക്ക് പ്രവേശിക്കാന് വെച്ച ഈ ഭാരമേറിയ ഇരുമ്പ് ഗ്രില്ല് റോഡിലേക്ക് തള്ളിനിൽക്കുന്ന രീതിയിലാണ് ഇപ്പോൾ കിടക്കുന്നത്. വീതി കുറഞ്ഞ ഈ ഭാഗത്ത് രാത്രികാലങ്ങളിൽ എത്തുന്ന വാഹനങ്ങൾ പ്രത്യേകിച്ച് ഇരുചക്ര വാഹനങ്ങൾ ഈ ഇരുമ്പ് ഗ്രില്ലിൽ തട്ടി അപകടത്തിൽപ്പെടാൻ സാധ്യതയേറെയാണ്.
റോഡിന്റെ വശത്തുകൂടി നടന്നുപോകുന്നവർക്കും ഇത് തടസ്സമുണ്ടാക്കുന്നു. മഴ പെയ്യുന്ന സമയത്ത് റോഡരികിലെ വെള്ളക്കെട്ടിൽ ഈ തടസ്സം തിരിച്ചറിയാൻ സാധിക്കാതെ വരുന്നത് അപകടത്തിന്റെ ആക്കം കൂട്ടും. റോഡ് നവീകരണത്തിന്റെ ഭാഗമായി എടുത്തു മാറ്റിയ ഗ്രില് സ്വകാര്യ വ്യക്തിയാണ് ഇവിടെ തിരികെ സ്ഥാപിച്ചിരിക്കുന്നതെന്ന് നാട്ടുകാര് പറയുന്നു. വലിയൊരു അപകടം സംഭവിക്കുന്നതിന് മുൻപ് ബന്ധപ്പെട്ട ഉദ്യോഗസ്ഥർ ഇടപെട്ട് ഈ ഇരുമ്പ് മേൽമൂടി സുരക്ഷിതമായി പുനഃസ്ഥാപിക്കണമെന്നാണ് ജനങ്ങളുടെ ആവശ്യം.
