പത്തനംതിട്ട: ശബരിമല നട അടച്ചിരുന്ന സമയത്തെ വിഡിയോ ചിത്രീകരിച്ച് സമൂഹ മാധ്യമങ്ങളില് പ്രചരിപ്പിച്ചയാള്ക്കെതിരെ പമ്പ പോലീസ് കേസെടുത്തു. പതിവായി ശബരിമലയില് നിന്നുള്ള വീഡിയോകള് എടുക്കുകയും സോഷ്യല് മീഡിയയില് പങ്കുവെക്കുകയും ചെയ്യുന്ന വ്ളോഗര്ക്കെതിരെയാണ് കേസെടുത്തത്. നടപടി എടുത്തതിന് പിന്നാലെ വ്ളോഗര് വീഡിയോ യൂട്യൂബില് നിന്നും നീക്കം ചെയ്യുകയും ചെയ്തു. ഹൈക്കോടതി നിയോഗിച്ചിരിക്കുന്ന സ്പെഷ്യല് കമ്മീഷ്ണര് ആര്. ജയകൃഷ്ണന് പമ്പ പോലീസിനോടും വനം വകുപ്പിനോടും ഈ സംഭവത്തില് റിപ്പോര്ട്ട് തേടിയിരുന്നു. ഇതിന് പിന്നാലെയാണ് പമ്പ പോലീസ് ഇയാള്ക്കെതിരെ കേസ് രജിസ്റ്റര് ചെയ്തത്.
നട അടച്ചതിന് ശേഷം ശബരിമലക്കാഴ്ച എന്ന പേരിലായിരുന്നു വീഡിയോ പോസ്റ്റ് ചെയ്തിരുന്നത്. 10 മിനുട്ട് ദൈര്ഘ്യമുള്ളതായിരുന്നു വീഡിയോ. കഴിഞ്ഞ മാസം 24-ാം തീയതിയായിരുന്നു വീഡിയോ അപ്ലോഡ് ചെയ്തത്. അനുമതിയില്ലാതെ ശബരിമലയിലെ ദൃശ്യങ്ങള് പകര്ത്തി പ്രചരിപ്പിക്കുന്നത് സുരക്ഷയുടെ പശ്ചാത്തലത്തില് ഗുരുതരമായ കുറ്റമാണ്. സന്നിധാനം, പമ്പ, നിലയ്ക്കല് പ്രദേശങ്ങളാണ് അതീവ സുരക്ഷാ മേഖലായി കണക്കാക്കിയിരിക്കുന്നത്. കഴിഞ്ഞ കുറച്ചു ദിവസങ്ങള്ക്ക് മുന്പാണ് ശബരിമലക്ക് മുകളിലൂടെ പറന്ന കോസ്റ്റ് ഗാര്ഡിന്റെ ഹെലികോപ്റ്റര് ദിശ തെറ്റി സന്നിധാനത്തിന് മുകളിലൂടെ പറന്നത്. ഈ വിഷയത്തില് ശബരിമല സ്പെഷ്യല് കമ്മീഷണര് റിപ്പോര്ട്ട് തേടിയിരുന്നു.
