കോന്നി : പുനലൂർ മൂവാറ്റുപുഴ സംസ്ഥാന പാതയിൽ നിന്നും കോന്നി താലൂക്ക് ആശുപത്രിപടിയിൽ എത്തിചേരുന്ന റോഡിന്റെ തകർച്ച യാത്രക്കാരെ വലയ്ക്കുന്നു. കോന്നി നഗരം ഗതാഗത കുരുക്കിൽ മുറുകുമ്പോഴും റോഡിന്റെ അറ്റകുറ്റപണികൾ നടക്കുമ്പോഴും എല്ലാം വാഹനങ്ങൾ ഇതുവഴിയാണ് തിരിഞ്ഞ് പോകുന്നത്.
എന്നാൽ കോൺക്രീറ്റ് ചെയ്തിരുന്ന റോഡ് ഇപ്പോൾ തകർന്ന അവസ്ഥയിലാണ്. റോഡിന്റെ ഒരു ഭാഗത്തെ ഓടയുടെ സ്ലാബും ഇളകി മാറിയിട്ടുണ്ട്. ഇത് മൂലം വാഹനകളുടെ ടയറുകൾ കുഴിയിൽ വീഴുന്നത് പതിവാണ്. വീതി കുറഞ്ഞ റോഡിൽ ഓടക്ക് മുകളിൽ സ്ലാബ് ഇട്ടായിരുന്നു വീതി കൂട്ടി നിർമ്മിച്ചിരുന്നത്. സ്ലാബ് ഇളകി മാറിയപ്പോൾ കാൽ നടയാത്രക്കാർക്കും ഇത് ഭീഷണിയാണ്.
മാത്രമല്ല സ്ലാബിനുള്ളിലെ കമ്പികൾ റോഡിലേക്ക് ഇറങ്ങി നിൽക്കുന്നതും കാണാം. സ്കൂൾ വിദ്യാർത്ഥികളും ആശുപത്രിയിലേക്ക് പോകുന്നവരും ഇതേ റോഡ് വഴിയാണ്. റോഡിലെ കോൺക്രീറ്റ് ഇളകി മാറി ചരൽ രൂപ പെട്ടതിനാൽ ഇരുചക്ര വാഹന യാത്രക്കാർക്കും ഇത് കൂടുതൽ ഭീഷണിയാകുന്നുണ്ട്. റോഡിന്റെ വീതി കുറവും യാത്രക്കാരെ വലക്കുന്നുണ്ട്.
