ന്യൂഡല്ഹി : രാജ്യത്ത് 18 വയസ്സ് പൂര്ത്തിയായ എല്ലാവര്ക്കും ഞായറാഴ്ച മുതല് സ്വകാര്യ വാക്സിനേഷന് കേന്ദ്രങ്ങളില്നിന്ന് കോവിഡ് വാക്സിന് ബൂസ്റ്റര് ഡോസുകള് ലഭ്യമാകുമെന്ന് കേന്ദ്രസര്ക്കാര്. വാക്സിന് സ്വീകരിക്കുന്നവര് ഇതിന് പണം നല്കണം. ഏപ്രില് പത്ത് ഞായറാഴ്ച മുതല് രാജ്യത്തെ എല്ലാ സ്വകാര്യ വാക്സീനേഷന് കേന്ദ്രങ്ങള് വഴിയും ആളുകള്ക്ക് മൂന്നാം ഡോസ് അഥവാ കരുതല് ഡോസ് വാക്സീന് സ്വീകരിക്കാം. ആദ്യ രണ്ട് ഡോസ് വാക്സീന് പോലെ കരുതല് ഡോസ് അഥവാ ബൂസ്റ്റര് ഡോസ് വാക്സീന് സൗജന്യമായിരിക്കില്ല. സ്വകാര്യ വാക്സീനേഷന് കേന്ദ്രങ്ങള് വഴിയാണ് വാക്സീനേഷന് എന്നതിനാല് പണം നല്കേണ്ടി വരും.
രണ്ടാം ഡോസ് വാക്സീന് എടുത്ത് ഒന്പത് മാസം പൂര്ത്തിയായ ശേഷം മാത്രമേ ബൂസ്റ്റര് ഡോസ് വാക്സീന് സ്വീകരിക്കാന് അനുമതിയുള്ളൂ. സര്ക്കാര് ആരോഗ്യകേന്ദ്രങ്ങള് വഴിയുള്ള ഒന്ന്, രണ്ട് ഡോസ് വാക്സീനേഷനും മുതിര്ന്ന പൗരന്മാര്ക്കും ആരോഗ്യപ്രവര്ത്തകര്ക്കും മുന്നിര കോവിഡ് പോരാളികള്ക്കും നല്കുന്ന ബൂസ്റ്റര് ഡോസ് വാക്സീനേഷനും തുടരും.
മൂന്നാം ഡോസ് നിര്ബന്ധമാക്കിയ വിദേശ രാജ്യങ്ങളിലേക്ക് യാത്ര ചെയ്യേണ്ടി വരുന്നവര്ക്ക് ബൂസ്റ്റര് ഡോസിനുള്ള അനുമതി ആശ്വാസമാകും. ചൈനയടക്കം വിവിധ രാജ്യങ്ങളില് കോവിഡ് വ്യാപനം തുടരുന്ന സാഹചര്യത്തില് ഇന്ത്യയിലും ബൂസ്റ്റര് ഡോസ് വിതരണം ചെയ്യണമെന്ന് ഒരു വിഭാഗം ആരോഗ്യവിദഗ്ദര് ആവശ്യപ്പെട്ടിട്ടുണ്ട്. നിലവില് ആരോഗ്യപ്രവര്ത്തകര്, കോവിഡ് മുന്നിര പ്രവര്ത്തകര്, അറുപതു വയസ്സുകഴിഞ്ഞവര് എന്നിവര്ക്കു മാത്രമാണ് ബൂസ്റ്റര് ഡോസ് സൗജന്യമായി ലഭിക്കുന്നത്. രാജ്യത്തെ പ്രായപൂര്ത്തിയായ വലിയൊരു വിഭാഗത്തിനും പണം നല്കി ബൂസ്റ്റര് ഡോസ് സ്വീകരിക്കേണ്ടി വരും.
സര്ക്കാര് വാക്സിനേഷന് കേന്ദ്രങ്ങള് വഴി ആരോഗ്യപ്രവര്ത്തകര്, മുന്നിര പോരാളികള്, അറുപതു വയസ്സുകഴിഞ്ഞവര് എന്നിവര്ക്കായി ഇപ്പോള് നടന്നുകൊണ്ടിരിക്കുന്ന ഒന്നാം ഡോസ്, രണ്ടാം ഡോസ്, ബൂസ്റ്റര് ഡോസ് വിതരണങ്ങള് തുടരുകയും അതിന്റെ വേഗംകൂട്ടുകയും ചെയ്യുമെന്നും സര്ക്കാര് പ്രസ്താവനയില് അറിയിച്ചു. പതിനഞ്ചിനും അതിനു മുകളിലും പ്രായമുള്ള 96 ശതമാനം പേര്ക്കും കുറഞ്ഞത് കോവിഡിന്റെ ഒരു ഡോസ് എങ്കിലും ലഭിച്ചിട്ടുണ്ടെന്നും 83 ശതമാനം പേര്ക്ക് രണ്ടു ഡോസും ലഭിച്ചിട്ടുണ്ടെന്നും പ്രസ്താവനയില് പറയുന്നു.
പല രാജ്യങ്ങളിലും കോവിഡ് വ്യാപനം ശക്തമാകുന്നതിന്റെയും മൂന്നാംഡോസ് സ്വീകരിക്കാത്തതിനാല് ചിലര്ക്ക് വിദേശയാത്രയ്ക്ക് ബുദ്ധിമുട്ട് നേരിടുന്നതിന്റെയും പശ്ചാത്തലത്തിലാണ് സര്ക്കാരിന്റെ പുതിയ നീക്കം. ഇസ്രയേല് പോലുള്ള രാജ്യങ്ങള് ബൂസ്റ്റര് ഡോസ് സ്വീകരിക്കാത്തപക്ഷം വാക്സിനേഷന് പൂര്ത്തിയായതായി അംഗീകരിക്കുന്നില്ല.
