കോട്ടയം: കോട്ടയത്ത് 12 കോടിയിലേറെ രൂപ ചെലവിട്ട് ടാറിങ് നടത്തിയ മൂവാറ്റുപുഴ – തൊടുപുഴ റോഡില് ടാര് ഉരുകിയൊലിക്കുന്നു എന്ന് പരാതി. മൂവാറ്റുപുഴ പിഒ ജംക്ഷന് മുതല് വാഴക്കുളം വരെ 10 കോടി രൂപയും, വാഴക്കുളം കല്ലൂര്ക്കാട് കവല മുതല് തെക്കുംമല വരെ 2.68 കോടിയുമാണ് റോഡ് ടാറിങ്ങിന് ഇവിടെ വിനിയോഗിച്ചത്. ശബരിമല പാക്കേജില് ഉള്പ്പെടുത്തിയാണ് നേരത്തെ കഴിഞ്ഞ എല്ഡിഎഫ് സര്ക്കാര് മൂവാറ്റുപുഴ മുതല് തൊടുപുഴ വരെ റോഡ് ടാര് ചെയ്തത്. അശാസ്ത്രീയ നിര്മാണം മൂലം റോഡില് പണി കഴിഞ്ഞ് അധികം വൈകാതെ തന്നെ നിറയെ കുഴികളുണ്ടായി. കുഴിയടച്ച് വീണ്ടും ടാര് ചെയ്തെങ്കിലും രണ്ടുമാസമായി റോഡിലെ ടാര് ഉരുകി തിരമാല പോലെ ഒഴുകിപ്പരക്കുന്ന നിലയിലാണ്. ഇതിന്റെ കാരണം ഇപ്പോളും വ്യക്തമല്ല. ഉരുകിക്കൂടിയ ടാറില് രാത്രികാലങ്ങളില് വാഹനങ്ങള് അപകടത്തില്പെടുന്നുണ്ട്. വലിയ അപകടങ്ങള്ക്കു വഴി തുറക്കും മുന്പ് ടാറിങ്ങിലെ അപാകത പരിഹരിക്കണമെന്നാണ് ആവശ്യം. അടിയന്തര നടപടി സ്വീകരിക്കാന് കരാറുകാരനു നിര്ദേശം നല്കണമെന്നു ജനപ്രതിനിധികളും നാട്ടുകാരും ആവശ്യപ്പെടുന്നു.
