കോന്നി : തണ്ണിത്തോട് എലിമുള്ളുംപ്ലാക്കലിൽ കനത്ത മഴയെ തുടർന്നുണ്ടായ മലവെള്ളപാച്ചിലിൽ റോഡിൽ കല്ലും ചെളിയും നിറഞ്ഞ് ഏറെ നേരം ഗതാഗതം തടസപെട്ടു. വൈകീട്ട് മൂന്നരയോടെ ആണ് ശക്തമായ മഴയുണ്ടായത്. തുടർന്ന് ആവോലിക്കുഴി ഭാഗത്ത് നിന്നും ശക്തമായ രീതിയിൽ വെള്ളം ഒഴുകി വരുകയും കല്ലും മണ്ണും എലിമുള്ളുംപ്ലാക്കൽ ചാവരുപാണ്ടി റോഡിലേക്ക്ഒഴുകി എത്തുകയും ആയിരുന്നു. തുടർന്ന് റോഡിൽ ഒരു മണിക്കൂറോളം ഗതാഗതം തടസപ്പെട്ടു.
എലിമുള്ളുംപ്ലാക്കൽ സോപാനം വീട്ടിൽ ബാലചന്ദ്രന്റെ വീടിന്റെ കാർ പോർച്ചിലേക്ക് മണ്ണും ചെളിയും ഇരച്ച് കയറി. ചാവര്പാണ്ടി റോഡിനെ ബന്ധിപ്പിക്കുന്ന മാടത്തേത് പടി റോഡിന്റെ സംരക്ഷണ ഭിത്തിയുടെ കുറച്ച് ഭാഗം മഴയിൽ തകർന്നു. മാസങ്ങൾക്ക് മുൻപാണ് ഇതേ റോഡിൽ മഴവെള്ളം കുത്തി ഒഴുകി റോഡ് തകർന്ന് കോൺക്രീറ്റ് ഇളകിമാറിയത്.
