തൊടുപുഴ : അജ്മല് ബിസ്മി ഷോറൂമില് നിന്ന് മൊബൈല് ഫോണുകളും അനുബന്ധ സാമഗ്രികളും ഉള്പ്പെടെ 25 ലക്ഷത്തോളം രൂപയുടെ മോഷണം നടത്തിയ കേസില് കടയിലെ ജീവനക്കാരനായ കോട്ടയം പെരുവ കാരിക്കോട് സ്വദേശി കടുവമാക്കല് വീട്ടില് കെ.എസ് ശ്രീജിത്ത് (26), ഇലക്രേ്ടാണിക്സ് വിഭാഗം മാനേജര് എറണാകുളം പള്ളുരുത്തി സ്വദേശി അംജത് (37) എന്നിവരെ തൊടുപുഴ പോലീസ് അറസ്റ്റ് ചെയ്തു.
കടയില് സ്റ്റോക്കില് വലിയ കുറവ് കണ്ടെത്തിയതിനെ തുടര്ന്നാണ് അധികൃതര് പോലീസില് പരാതി നല്കിയത്. സംഭവത്തിനു ശേഷം ഒളിവില് പോയ ശ്രീജിത്തിനെ എസ്.ഐ ബൈജു പി. ബാബുവിന്റെ നേതൃത്വത്തില് മോനിപ്പള്ളിയിലെ വാടക വീട്ടില് നിന്നാണ് അറസ്റ്റ് ചെയ്തത്. ഇതെ തുടര്ന്നാണ് മാനേജര്ക്കും സംഭവത്തില് പങ്കുണ്ടെന്ന് കണ്ടെത്തി അംജത്തിനെയും അറസ്റ്റ് ചെയ്തത്. ഇവര് രണ്ട് പേരും ചേര്ന്നാണ് തട്ടിപ്പ് നടത്തിതിയിരുന്നതെന്ന് പോലീസ് പറഞ്ഞു.
കടയില് വില്പനയ്ക്ക് വെച്ചിരിക്കുന്ന വില കൂടിയ ഫോണുകളും മറ്റും ഓര്ഡര് പ്രകാരം മറ്റ് കടകളില് എത്തിച്ചു കൊടുക്കാന് എന്ന പേരിലാണ് ശ്രീജിത്ത് കടത്തിയിരുന്നത്. പിന്നീട് ഓര്ഡര് റദ്ദാക്കിയെന്നും പറഞ്ഞ് ഫോണുകളും മറ്റും മാറ്റിയ ശേഷം ഇതിന്റെ കവര് മാത്രം തിരികെ കടയില് എത്തിക്കുകയും ഇവ തിരികെ കിട്ടിയതായി മാനേജര് സാക്ഷ്യപ്പെടുത്തുകയും ചെയ്യുന്നതായിരുന്നു ഇവരുടെ രീതി. ഇരുവരെയും കോടതിയില് ഹാജരാക്കി റിമാന്ഡ് ചെയ്തു. ഇവര് ഇത്തരത്തില് കടത്തി കൊണ്ടു പോയ രണ്ട് ഫോണുകള് പോലീസ് കണ്ടെടുത്തു.
