പാലക്കാട്: ട്രെയിനില് മോഷണം പതിവാക്കിയ യുവാവ് പിടിയില്. ആലപ്പുഴയില് നിന്ന് ചെന്നൈയിലേക്ക് പോവുകയായിരുന്ന ഇന്ത്യന് വംശജന്റെ സാധനങ്ങള് മോഷണം പോയ കേസിലെ അന്വേഷണത്തിലാണ് എറണാകുളം സ്വദേശി പിടിയിലായത്. എറണാകുളം വൈറ്റില ജൂനിയര് ജനത റോഡില് പുളിക്കപ്പറമ്പില് ജോയിയുടെ മകന് ടോണി ജെയിംസ് എന്ന തവള ജോര്ജ്ജാണ് പിടിയിലായത്.
അമേരിക്കയില് സ്ഥിര താമസമാക്കിയ തമിഴ്നാട് സ്വദേശിയെ ആലപ്പുഴ ചെന്നൈ യാത്രയ്ക്കിടയില് 22640 ട്രെയിനില് വച്ചാണ് കൊള്ളയടിച്ചത്. ആപ്പിള് കമ്പനിയുടെ ലാപ്ടോപ്പ്, ഇയര് പാഡ്, ഐ പാഡ്, ഐ ഫോണ്, മുപ്പതിനായിരം രൂപ എന്നിവയാണ് മോഷണം പോയത്. പരാതിയെ തുടര്ന്ന് നടത്തിയ സ്റ്റേഷനുകളിലെ സിസിടിവി അടക്കം പരിശോധിച്ച് നടത്തിയ അന്വേഷണത്തിലാണ് സംശയകരമായ സാഹചര്യത്തില് രണ്ട് യുവാക്കളെ കണ്ടെത്തുന്നത്. ഇവരെ കഴിഞ്ഞ ദിവസം ഒലവക്കോട് സ്റ്റേഷനില് വച്ച് വീണ്ടും കണ്ടെത്തുകയായിരുന്നു.
