മലയാറ്റൂര് : ശിശിര ട്രാവല്സ് ഉടമ സുധീറിന്റെ വീട്ടിലാണ് മോഷണം നടന്നത്. 20 പവന് സ്വര്ണവും നാല്പ്പതിനായിരം രൂപയും മോഷ്ടാക്കള് കവര്ന്നു. കാലടി പോലീസ് അന്വേഷണം തുടങ്ങി. പുലര്ച്ചെ 2-നും 4-നും ഇടയിലാണ് മോഷണം നടന്നതായി കരുതുന്നത്. വീടിനു പിറകുവശത്തെ വാതില് പൊളിച്ചാണ് മോഷ്ടാവ് അകത്ത് കയറിയത്. സുധീറിന്റെ അമ്മയുടെ കിടപ്പുമുറിയിലെ അലമാരയില് ഉണ്ടായിരുന്ന സ്വര്ണവും പണവുമാണ് മോഷണം പോയത്.
അലമാര തുറന്ന് കിടക്കുന്നത് രാവിലെ ശ്രദ്ധയില്പ്പെട്ടപ്പോഴാണ് മോഷണ വിവരം അറിയുന്നത്. വീട്ടുകാരെല്ലാം ഉറക്കത്തിലായിരുന്നതിനാല് മോഷണം നടന്ന സമയത്ത് അറിഞ്ഞില്ല. എന്നാല് രാത്രി 1 മണി സമയത്ത് അയല്പക്കത്ത് ഒരാളെ കണ്ടതായി വീട്ടുകാര് പറഞ്ഞു. പെരുമ്പാവൂര് എഎസ്പി അനൂജ് പലിവാള് സ്ഥലത്തെത്തി പരിശോധന നടത്തി. വീട്ടുകാരുടെ പരാതിയില് കേസെടുത്ത കാലടി പോലീസ് അന്വേഷണം ആരംഭിച്ചു.
