ദുബായ് : എമിറേറ്റിലുടനീളം ഡെലിവറി റൈഡര്മാര്ക്കായി വിശ്രമ കേന്ദ്രങ്ങൾ നിർമിക്കുന്നു. 40 എയര് കണ്ടീഷന് ചെയ്ത വിശ്രമ കേന്ദ്രങ്ങളാണ് ദുബായ് ആർടിഎ ഒരുക്കുന്നത്. റൈഡര്മാര്ക്ക് ആവശ്യമായ വിശ്രമം ലഭ്യമാക്കി സുരക്ഷ ഉറപ്പാക്കുകയും അതിലൂടെ അപകട സാധ്യത കുറക്കുകയുമാണ് ഇതിന് പിന്നിലെ ലക്ഷ്യം. ആയിരക്കണക്കിന് ഡെലിവറി റൈഡര്മാരാണ് ദുബായില് പ്രവര്ത്തിക്കുന്നത്. വിശ്രമ കേന്ദ്രങ്ങൾ വരുന്നതോടെ ഡെലിവറി ഡ്രൈവർമാർക്ക് കൂടുതൽ കാര്യക്ഷമമായി പ്രവർത്തിക്കാനാകുമെന്നാണ് പ്രതീക്ഷിക്കുന്നത്. പുതിയ ഓര്ഡറുകള്ക്കായി കാത്തിരിക്കുന്ന ഇടവേളകളില് ഡെലിവറി റൈഡര്മാര്ക്ക് സുഖപ്രദമായ സൗകര്യങ്ങള് ലഭ്യമാക്കുന്നതിന്റെ ഭാഗമായുള്ള നടപടിയാണെന്ന് ദുബായ് ആര്ടിഎ അറിയിച്ചു.
ഓര്ഡര് ഇല്ലാത്ത സമയത്തും എയര്കണ്ടീഷന് ചെയ്ത കേന്ദ്രങ്ങളില് വിശ്രമിക്കാനാകും. അടുത്ത വര്ഷം ജൂലൈയില് പ്രവര്ത്തനം ആരംഭിക്കുന്ന രൂപത്തിലാണ് നിര്മ്മാണം ആസൂത്രണം ചെയ്തിരിക്കുന്നത്. വാട്ടര് കൂളര് , സ്നാക്സ്, ഡിസ്പെന്സര്, മൊബൈല് ചാര്ജിങ് സ്റ്റേഷന് എന്നിവയടക്കമുള്ള സൗകര്യങ്ങളും എല്ലാ കേന്ദ്രങ്ങളിലുമുണ്ടാകും. ഓരോ വിശ്രമ കേന്ദ്രങ്ങളിലും 10 പേര്ക്ക് ഓരേസമയം ഇരിക്കാന് സൗകര്യമുണ്ടാകും. ട്രാഫിക് മേഖലയിൽ മികച്ച നഗരമായി മാറുക എന്നതാണ് ദുബായിയുടെ ലക്ഷ്യം.
